كلّ البشر انعطوا دينين تيسمعوا، ولكن يللي عم يسمعوا قلال.
ومن هالبشر اللي عم يسمعوا يللي عم يفهموا قلال،
وقلال كثير من يللي عم يسمعوا ويفهموا عم يعيشوا يللي سمعوه ويحيوا بيللي فهموه. السالكين صوب الملكوت قلال والباب ضيّق.
إصغوا، إفهموا، وإشهدوا.
اصغوا لصوت الربّ، افهموا الحقيقة، وإشهدوا للحقيقة يللي أدركتوها وعيشوا فيها.
اصمت تتسمع وإصغِ لصوت الربِّ. لكن انتبه ما تسمع تردّد صدى أفكارك وتصغي لحالك: تخطىّ أفكارك، خلّي كلمة ألله تنقّيها، تمحي اللي تمحيه وتكتب اللي لازم تكتبو من جديد.
الإنسان هو جزء من الكلّ، الجزء لازم يصغي للكلّ. مثل نقطة الميّ للنّهر: نقطة الميّ ما فيها تكون نهر، ولو كانت بتحوي من كلّ شي من النّهر، لكن النّهر كلّو نقط ميّ بمسيرة واحدة.
نقطة الميّ بالنّهر هي نهر، لكن نقطة الميّ اللي خارج النّهر هي نقطة ميّ.
إصغِ لمسيرة الكون، إنت جزء منها.
الكون كلّو بمسيرة حجّ صوب قلب الآب، مثل مسيرة الأنهار صوب البحر.
ما تقبل تكون خارج هالمسيرة. نقطة الميّ اللي خارج النّهر ما فيها أبداً تصبّ بالبحر.
إصغِ، وإفهم الحقيقة وخلّيها تنفذ لروحك، كسّر كلّ طبقات القشور وفتّت التراكمات يللي لفّك فيها العالم وكسيتك وحجبت وجه الله عنّك. تنازل وتخلّى عن الأفكار يللي حجبت صوت الله عنّك حتّى ولو البعض منها كوّنك وصنعك.
إصغِ بتواضع وخلّي قلبك ليّن وعقلك حرّ.
الإصغاء بدون تواضع وإنسحاق مثل الصدى الضايع بالوديان: مهما يكون الصدى قوي بيضلّ الجبل جبل والوادي وادي والحجر حجر.
إصغِ بتواضع، إفهم الحقيقة بعمق، وإشهد بشجاعة.
إصغِ تتفهم وتعرف، وعيش بحسب الحقيقة اللي عرفتا:
ما بيكفي تعرف الطريق تتوصل لازم تمشي عليها. ألله بيضوّيلك على الصفحات بسّ لازم إنت تقرأ، الله بينوّرلك دربك بسّ لازم إنت تمشي. ويللي بيطلع بيطلع عاجريه ويللي بينزل بينزل عاجريه ومطرح ما بتوصل إجريك بيكونوا أخدوك.
كون دايماً بحالة إصغاء وفحص ضمير دايم، عيد حساباتك كلّ يوم وغيّر حياتك وجدّدها.
إصغِ بتواضع بتسمع وبتفهم الحقيقة والحقيقة بتحرّرك. تحرّر من الحبال اللي مربّطتك:
أفكاركن الخاصة ومعتقداكن الذاتية وأهواؤكن بتربّطكن مثل الحبال اللي بتربّط المركب على الشطّ. المركب على الشطّ بالمينا حبالو بتهدّي وبتعطي الأمان لكن ما بتسمحلو يبحر.
خلّوا كلمة الله تفكفكلكن حبالكن وتقطش يللي لازم تقطشو حبل ورا حبل حتى ولو تألّمتوا.
ما تسكنوا بقلب أهواؤكن وأفكاركن حتى ولو عطتكن الأمان والرّاحة. الأمان وهم بدون سلام المسيح، والرّاحة خدعة إذا ما كانت بقلب الله.
ما تخافوا تتحرّروا من الشطّ وتطلعوا من المينا. خلّو الله يحرّركن، وكلمتو توجّهكن والروح ينفخ أشرعتكن بتوصلوا لشطّ النّور. المركب تيعبر البحر مش تيبقى بالمينا.
تيبحر المركب ويروح للعمق البعيد، لازم يفكّ كلّ حبالو، إذا حبل واحد بقي رابطو بيبقى بالمينا.
حافظ بسّ على الحبال يللي بتربط أشرعتك وبتوجّهك وحبال المحبّة والشراكة يللي بتربطك بخيّك الإنسان.
رحلتك بهالعالم هي مشوار قداستك.
القداسة حالة تحوّل دايم من المادّة للنّور.
صلّي تتصغي، صلّي تتفهم، وصلّي تتعيش إيمانك وتطبّق وتشهد. صلّي تتتحوّل لنور.
إصغِ بصلا، إفهم الحقيقة بصلا، عيش وإشهد بصلا.
خلّي حياتك كلّها تكون صلا وخدمة: إذا بتصلّي بدون خدمة بتعمل من صليب المسيح بحياتك خشبة، وإذا بتخدم بدون ما تصلّي بتكون عم تخدم حالك.
صلّي بمخدعك. صلّي بعيلتك. وصلّي بجماعتك الكنسية.
صلّي بمخدعك بحميمية مع الرّب بتحفظ روحك وبتفتح عقلك على سرّ الله. صلّي بعيلتك بتحفظ عيلتك وبتوضعها بقلب الثالوث. صلّي بجماعتك الكنسية بتحفظ كنيستك وبتقرّب الملكوت.
صلاتك الشخصيّة بإنفراد مع الرّب بتحطّك بقلب الله، صلاتك العائلية بحضن العيلة بتوضعك بحضن الثالوث، صلاتك الجماعية بقلب الكنيسة بتثبّتك بجسد المسيح.
صلّي. الإنسان اللي بيصلّي بيعيش سرّ الوجود، والإنسان اللي ما بيصلّي بالكاد موجود.
تمرّس بالصمت، الصمت المصغي الحيّ البعيد عن سكون العدم.
تمرّس بالصّمت، اندعك بالمحبّة، تخمّر بالقداسة.
إصغِ تتسمع، تواضع تتفهم، آمن وتشجّع تتشهد، وحبّ تتتقدّس.