بيفتّشوا البشر على آيات تيآمنوا، وعلى علامات تيلمسوا ويشوفوا وعلى رسائل تيسمعوا ويعرفوا وعلى طريق تيمشوا ويوصلوا للخلاص والسعادة.
الآية هيّ القربان، العلامة هيّ الصليب، الرسالة هيّ الإنجيل، والخلاص بالكنيسة.
أهمّ و أعظم وأقدس علامة هي علامة الصليب، الصليب هو علامة محبّة الله لإلكم، خلّوه كمان يكون علامة محبّتكم لألله. علامة الصليب علامة محبّة مش علامة تحدّي ونور هالعلامة رح يشعّ بكلّ العالم.
خلاص البشرية بالكنيسة، الكنيسة هيّ يللي حاملي مشروع الخلاص يللي بدؤه المسيح من ألفين سني وما بينتهي قبل نهاية العالم، كلّ أمواج الشرّ رح تتحطّم على صخرة الكنيسة. التزموا إلتزام كامل بالكنيسة وبكلّ تعاليمها ولا تنقّوهم تنقاية.
أهمّ وأعظم رسالة هيّ رسالة الإنجيل يللي بتحمل تعليم المسيح، ولا حرف من كلامو بيزول قبل زوال العالم. يللي ما بيعرف الإنجيل بيبقى جاهل وعايش بالظلام ولو عندو كلّ معرفة الدّني ويللي ما بيعيش الإنجيل بيكون مش عايش. ولا تحرّفوا تتبرّروا. حقيقة الإنجيل بتبقى دايماً هيّ هيّ.
أهمّ و أعظم آية هيّ القربان المقدّس، جسد المسيح، حمل الفصح الحامل خطايا العالم، الإله الحيّ القائم من الأموات.
عبث تفتّشوا عن علامات أهمّ من علامة الصليب، ما تطلبوا رسايل بتعتقدوا إنها أهمّ من رسالة الإنجيل، ما تفتّشوا عن خلاصكم خارج كنيسة المسيح، ما تلتهوا تركضوا ورا آيات تبهر عيونكم أعظم من آية القربان المقدّس. ابتعدوا عن السحر الخدّاع لأنو بودّيكم على الفراغ.
العلامة يللي ما بتدلّكم على علامة الصليب تجنّبوها. الرسالة يللي ما بتنبع من رسالة الإنجيل اهملوها. العجيبة يللي ما بتودّيكم للقربان ارذلوها. وبالكنيسة كلّها بتميزوها.
بالصليب والكنيسة والإنجيل والقربان بتتقدّسوا. الله خلقكم تتتقدّسوا مش تتموتوا.
القداسة مش حظّ، القداسة خيار، ما تنطروها تهبط وتجي لعندكم من الخارج، لازم تعيشوها وتحقّقوها من الداخل. ملكوت الله بقلبكم.
القداسة نعمة وإرادة: النعمة من عند الله والإرادة من عندكم. إنت قدّيس بالقوّة، اجتهد تتكون قدّيس بالفعل.