لمّا السراج ينوص بعزّ العتم بيعبّوه زيت، والسراج عم ينوص ونورو عم يخفت والظلام حالك.
ملّوا سراجكن زيت قبل ما ينطفي وتغرقوا بالعتمة. السراج اللي بتسهروا على نورو اسهروا على زيتاتو.
السراج اللي بيسهر عليكم اسهروا عليه.
سراجكم عم ينوص وصار نور بيتكم أقرب للظلام. غرقانين بالنظر قدّام عينيكم غافلين عن النّور اللي بيضوّي عتماتكم.
نوّروا ظلامكم بسراجكم طالما في ليل، ما تناموا على العتم وتنطروا ضوّ النّهار تيطلع. لمّا بيطلع نور النّهار بيبلّش شغل ثاني وبتنسألوا عن شغل الليل.
إذا خَفَت نور سراجك من نقص الزيت، ملّيه زيت، ما تروح تسهر على نور سراج خيّك وتترك سراجك يطفي، رح تنسأل عن سراجك اللي كنت عم تسهر على نورو وانطفا.
خلّوا النور ضاوي بكلّ سراج حتى يطلع النهار.
والسراج بيعبّوه زيت ما بيعبّوه نوايا وأماني ولا بيعبّوه ميّ بهواني.
اهتمّ بنور سراجك قبل شغلك وإنتاجك.
عيدوا النّظر بأولوياّتكم. صار سلّمكن بالقِلب. الدّرجة الصغيرة تحت والدرجة الكبيرة فوق.
شوفوا البنّاء الحكيم كيف بيعلا بنيانو: الحجر الأكبر تحت والحجر الأصغر فوق.
كتار من البشر هالإيام عم يبنوا حيطانهم بالقِلب: ماعادوا عم يعرفوا الكبير من الصغير ولا الأوّل من الآخر ولا المهمّ من الأهمّ. والحيط اللي حجرو الأصغر تحت وحجرو الأكبر فوق بيهوي وبيوقع البنا. كتيرة الحيطان اللي عم تنهار والمداميك اللي عم تتفكّك من جهل العاملين وكبرياء البنّائين.
علّي إنت بنيانك بحكمة: إبنِ على أساس المسيح، الصخرة الأساسية لكلّ بنيانك اللي بتحمل كلّ مداميكك.
حطّ حجارك الكبيرة عند الأساس، وحجارتك الأصغر فوق.
إذا بواحد من حيطان بناءك، شفت حجر كبير بالمدماك العالي وحجر صغير عند الأساس، فكّ حيطك كلّو وابنيه من جديد: أفضل تعيد بناءك من الأوّل قدّ ما كان كبير وعالي من إنّو ينهار ويتهدّم ويسقط على راسك أو على راس إخوتك أو أولادك.
تأكّدوا مليح إذا ما كان المسيح هو الأساس بكلّ بنيان رح يتهدّم وينهار، وما تنبهروا بالبنيان العالي القايم عالإنسان رح ينهار قدّ ما يعلا ورح يمحيه الزّمان.
إذا كنت بنيت بناءك كلّو واكتشفت مأخّر إنّو مش مبني عالمسيح رجاع فكّو كلّو وعمّرو من جديد.
مدماك مبني عالمسيح أفضل من برج عالي بيهوي مع الرّيح.
بناء الربّ أساسو المسيح، إنتو حجارتو الحيّة و الروح القدس هو مفتاح العقد.
المسيح بيحمل كلّ البنيان، والروح بيجمع حجار العقد وبيهدّي كلّ الحيطان. الروح روح المحبّة . المحبّة مفتاح العقد. إذا شلتوا الروح، بتشيلوا مفتاح العقد: بيفرط العقد، بيتفككوا الأحجار وبينهار البنيان كلّو.
الروح القدس، روح المحبّة، مفتاح العقد اللي بيحفظ العهد.
كلّ حجر بالبناء لو مطرحو: كلّ حجر بمدماك فيه تحتو حجار حاملتو، وحدّو حجار ساندتو وهو ساندها، وفوقو حجار هو حاملها. وكلّ حجر مقصّب تيعبّي مطرحو. الحجر اللي بينقص من البناء ما بيبقى مطرحو فراغ، لكن بيترك مطرح للشتي والهوا وللغبرة والريح. الحجر اللي بينقص مطرحو بيدخّل عوامل الخارج للداخل.
ما تخلّوا فراغ بين الحجر والحجر، بيطلع البناء ركيك. وما تخلوا كمان تراب بين الحجر والحجر، بيقوى الشّتي وبيعلا الثلج وبينساب التراب وبيتخلخل البناء. قوّة الروح يللي بتجمع حجار البناء مش التراب يللي بيلصقها ببعضها.
إثبتوا ببناء الربّ. ثابروا على بناء الملكوت، كونوا حجارة حيّة بهيكل الربّ:
الحجر يللي ما بيكون بهيكل الرّب بيبقى حجر بالرجمة، إلو حجم بسّ ما إلو شكل ولا مكان ولا دور، حجر مرمي بكومة حجار.
أترك حالك بين ايدين الرّب البنّاء الحكيم، خلّيه ينجفك ويقصّبك، يشيل الزّايد منّك ويكمّل الناقص فيك، خلّي الرّب يعطيك الشّكل والحجم والمكان، إن كنت حجر كبير أو حجر صغير، إلك مكانك اللي إنت مقصّب على قدّو.
خلّي الرّب يبنيك، بتاخد مطرحك بالمدماك. ما تحطّ حالك بالمطرح يللي بيستهويك: إذا أخدت مطرح أكبر من مطرحك بتبقى نافر وبتخلخل الحيط كلّو، وإذا أخدت مطرح أصغر من المكان المعدّ إلك، بيبقى في حولك فراغ.
عبّي مطرحك، حمول اللي فوقك، سنود اللي حواليك، والقي على يللي حاملك. المسيح بيحمل الكلّ و الروح بيجمعكم وبيهدّيكم.