ماشيين على دروب حياتكن حاملين أثقال وأعباء وهموم كتيرة، حاملين جرار وجرار شي بعازة وشي بلا عازة، وموزّعين كنوزكن بكل جراركن، خالطين كنوزكن بقشوركن، ما عدتوا تعرفوا كنزكن وين ولا بأيّ جرّة، وجرار بتوقع وبتتكسّر وكنوز بتنهدر، لا بتشوفوا ولا بتدروا على عجقة جراركن، وناس بيهدروا كنوزن على دروب حياتن وبيوصلوا محمّلين فخّار.
كلّ جرّة حاملينها وما فيها من كنزكن بتكون ملياني لهو وحمل زايد بيعيق مسيرتكن وبيتعّبكن.
تخلّوا عن جرار السّخرة اللي بيسخّركن الها العالم، ولو كنتوا حملتوها مشوار طويل وتعبتوا عليها وتعذّبتوا فيها ويمكن تعوّدتوا عليها. اعرفوا وين كنزكن وحطّوا فيه كلّ قلبكن. حطّ كنزك كلّو بجرّة واحدة واحملها منيح. بتحفظ كنزك وبتوصل مليان. جرّة واحدة حمول: جرّة المسيح وهو بيكنزلك ياها محبّة وبيحملها معك. قدّ ما تنتلي بتضلّ تساع وقدّ ما تتقل بتضلّ خفيفة. وكلّ الجرار الباقية كلّها فخّار ولو كانت فاضية بتبقى تقيلة وبتحنيلك ضهرك.
اختار إنت دربك بهالدني، ما تخلّي دروب الدني هي تختارك، وما تحمل جرار هالعالم اللي بيحمّلك ياها تيلهيك ويتعّبك.
كلّ ما تكتر جرارك كلّ ما تبعد عن جارك. كلّ جرّة بدّها مسافة، وكلّ ما يكتروا جرارك بتزيد حولك المسافات وبتصير تبعد عن خيّك تما يصطدموا الجرار ببعض ويتكسّروا. بتصير الجرّة أهمّ من خيّك. تتحافظ على جرارك بتخسر خيّك وجارك.
اعرف إنّو كنزك ثمين كتير لكنّك حاملو بفخّارة. وكلّ خيّ إلك كنزو ثمين وحاملو كمان بفخّارة.
بتصنّع جرّتك بإيدك وبتتكعوك بقلبها، بتقعد بقلب الجرّة وبتقول الدّني فخّار، اللي بيقعد بقلب الجرّة بيشوف الدّني كلّها فخّار. إطلع من جرّتك وشوف الدّني مثل ما هي مش مثل ما إنت ابتدعتها بقلب جرّتك.
كلّ واحد يملّي جرّتو من كنز المسيح لأنّو هو وحدو الكنز الحقيقي.
تتفهم خيّك الإنسان، ما تروح صوبو بنظام فكري شغل عقلك، روح صوبو بمحبّة من روح، الخالق حَطّها بقلبك.
كونوا حبّات قمح ملياني على بيدر الربّ، لمّا المدراية بتعمل فيكم وبترميكم بالجوّ تتنقّيكم بتكونوا ثقال وبتهبطوا على البيدر تتتجمّعوا بإهراءات الحياة، ما تكونوا حبّات فارغة خفيفة مثل قشّ التبن بياخدها الهوا وبيدريها خارج البيدر وبيشتتها. وتأكدوا إنّو ما في شي بيملّيكم وبيعطيكم وزن إلاّ المسيح. انتلوا من المسيح بتبقوا على البيدر وبتنجمعوا. وطالما إنتو على البيدر رح تضلّ المدراية تدرّيكم والتبن والقشّ يطير لبعيد. على البيدر كلّ حبّة قمح بتبقى لوحدها حتى ولو انجمعت مع بقية الحبات إخوتها بالمكيال والشوال. حجر الطاحون والميّ والنار بيعملوا من حبّات القمح كلّها طحنة واحدة وعجنة واحدة ورغيف واحد.
من الحقل للرغيف المشوار طويل: صلّوا للمنجل يللي بيحصدكم، وللمورج يللي بيدرسكم، والبيدر يللي بيجمعكم، والمدراية اللي بتنقّيكم، وحجر الطاحون يللي بيطحنكم، والميّ اللي بتعجنكم، والنار اللي بتخبزكم.
درب القداسة من الحقل للرغيف، من التراب للنّور، من المزود للصليب والقيامة: اسلكوه بفرح القيامة.