مقدمة القداس

ما أجمل اللقاء حول مذبح الرب، قمة اتحادنا بالأب يلي أوجدنا والكلمة يلي افتدانا والروح الذي يثبتنا بالإيمان.
ما أجمل إنو نمشي سوا كعيلة مسيرة زمن المجيء سر تجسد الرب يسوع يلي تنازل ولبس بشريّتنا ليرفعنا إلى مستوى الألوهية.
ما أجمل أن نتأمل مريم في زمن التجسّد، تعلن أنّها أمة الرب. فتعطي البشريّة أسمى فعل تواضع وطاعة.

نحنا محظوظين لأنّو:
أعطي لنا أن نعيش هذا الزمن بكنف القديس شربل بديرو ورهبنتو وجوار محبستو. فلنستعدّ بتواضع القلب والتوبة الصادقة.
في الكهنة موجودين بكراسي الإعتراف.
أعطي لنا أن نتتلمذ على أيدي معلّمي الكنيسة: واليوم مع راعي أبرشية جبيل المارونية سيادة المطران ميشال عون السامي الاحترام بعاونو الأب شربل رعد.
تحتفل الكنيسة اليوم بعيد الرسول إندراوس تلميذ المسيح وأخ القديس بطرس منعيّد كلّ يلّي بيحملو إسمو.
في سلّة موجودة على درج المذبح حتى نوضع فيا أسماء مرضانا، موتانا والنوايا لبدنا نصلي لأجلا.
كتاب القداس على الصفحة 84
فأهلا وسهلا فيكن إخوتي باللقاء الأسبوعي لعيلة مار شربل حتى سوا نكون عم عم نسبّح ونمجّد الله.
آمين

النوايا

نية الوطن والعالم
يا بينا السماوي، منرفعلك كل عالمنا، خاصة بهالأوقات الصعبة. حوّل يا ربّ الأزمات اللي عم تمرق فيا البشريّة لفرص تكتشف فيا رحمتك وتقرّب الناس منّك أكتر.
ومنصلّي عنيّة وطنّا الحبيب لبنان. ذكّرنا يا ربّ بتاريخنا اللي فيه اكتشفنا إنّك صخرة خلاصنا الوحيدة على رغم أصعب الظروف اللي مرق، علّمنا نكون أدوات سلامك ونكون ملح الأرض ويصير العالم كلّو يشبه ملكوتك. بشفاعة إمنا مريم العدرا، منسألك يا رب.

نية الإنجيل
"هذه مشيئة أبي، أنّ كلّ من يشاهد الإبن ويؤمن به ينال حياة أبديّة".
يا رب، زيدنا إيمان تنعرف نختبر حضور الإبن بحياتنا وندرك إنّو هو حاضر هون وهلّق وبكل قدّاس.
وخلّينا من خلال العلاقة بيسوع نوعى لمشروعك ولمشيئتك ونمشي حياتنا بحسب رضاك.
بشفاعة بي عيلتنا مار شربل، منسألك يا رب.

نية العيلة والمكرسين
منوضع على مذبحك يا رب كل الكهنة والرهبانيات وخاصةً الرهبنة اللبنانية المارونية. الحصادُ كثيرٌ والفعلةُ قليلون". بارك الدعوات الكرّسة ونمّيها وازرع مواهب روحك القدّوس بالقلوب.
منذكر كل الجماعات الروحيّة لي عم تشتغل بمشروعك يا ربّ، مشروع القداسة. بشكل خاص منسلمك عيلتنا، عيلة مار شربل، صوت صارخ بمجتمعنا اليوم. بارك أفرادا وخاصة كل شخص عم يعطي من وقتو وصحتو لتستمر برسالتها وتحصد قدّيسين بشفاعة مار شربل والعدرا مريم منسألك يا رب.

سلة النوايا
"أشيدوا للرب فإنّه قد صنع عظائم"
بزمن البشارات ومتل كل مساء جمعة جينا يا رب لعندك محمّلين من كل اللي حمّلنا ياه هالعالم... هموم صلوات أمنيات رغبات طلبات... منحطّن على مذبحك ونحنا على ثقة إنّك رح تبشّرنا بالفرح والخلاص.
تعا يا رب بشّر كل زوجين ناطرين نعمة طفل لأن وحدك بتعطي الحياة بقلب العقم وبتصنع فين العظائم.
تعا يا رب بشّر كل شب وصبيّة بالفرح تيسعوا للاتّحاد بسرّ الزواج المقدّس وكون أنت وحدك تالتن وجامعن وباني بيتن.
بزمن البشارات زمن الفرح والإنتظار عيال كتيرة تخاصموا أفرادها تعا ارجع على بيتن وبشّرن بالسلام.
بزمن الإنتظار كترت أوجاع عيالنا فقر حاجة بطالة... قلّة سببها هالعالم الجشع... ما تسمح يا رب إنه يغيب العيد من قلوب النّاس الهُم المرتاح يساعد التعبان، المقتدر يساعد المحتاج، المغتني يساعد الفقير. كل شي منّك ولإلك، إلهُم أبناءك على المشاركة الحقيقيّة ليعرفوا فرحك ويفرّحوا قلبك وقلوب كتار ويصير العيد حقيثقي.
كل حاجاتنا وطلباتنا اللي حطيناها بالسلة منحطها بقلبك.
أنت وحدك رح ترد سلتنا مليانة نعم وبركات وفرح. بشفاعة العدرا مريم ومار شربل منسألك يا رب.

مرضى
المرض ما إلو زمن ولا وقت ولا بيعرف يميّز بين الناس، بيغدر وبيغيّر حياة الإنسان. ما تسمح يا رب إنو المرض يكون سبب يأس بل معك وبحضورك بيتحوّل لسبيل حياة معك كل ألم ووجع بيصير طريق صوب القداسة.
بزمن الإنتظار مرضانا ناطرين النِعَم من قلبك. مناخد لحظات صمت منذكر كل مرضانا...
تعا يا رب بشّرن بالشفا وملّي قلوبن وقلوب أهلن بالرجا والقوّة والإيمان يللي ما بيتزعزع.
بشفاعة العدرا مريم ومار شربل منسألك يا رب.

موتى
كل من يشاهد الإبن ويؤمن به ينال حياة أبديّة وأنا أقيمه في اليوم الأخير.
بزمن البشارات  اللي سبقونا أهلنا وأحبابنا يللي بالعيد منشتقلن أكتر بالعيد منستفقدلن.
اغفرلن يا رب وقيمن للحياة الأبدية والفرح اللي ما بيزول.
مناخد لحظات صمت منذكر كل موتانا...

الشكران
بنهاية قداسنا ما فينا يا رب إلّا ما نسبحك ونشكرك على أعمالك العظيمة على حبّك اللامتناهي وعلى فرح إمنا مريم بنت صهيون وفرح البشريّة كلها لأن القدّوس حلّ بوسطها عمّانوئيل إلهنا معنا.
منشكرك يا يسوع إبن الله الحي لأنّك تجسدت من أجل خلاصنا وبذل ذاتك عطيتنا جسدك ودمك خبزنا وزوادتنا اليوميّة. وبتناولنا جسدك المقدس وسماعنا لكلمتك منّال الحياة وبوفرة وصولاً للأبدية.
منشكرك يا روح الله القدوس لكنت وبعدك بتفيض علينا مواهبك وبترافقنا بمسيرتنا مسيرة الخلاص بروح الحب المتجدّد.
وعدنا لالك يا أيّها الثالوث نكون على مثال مريم نقبل النعمة والبشارة ونتحوّل لتلاميذ ورسل حقيقيّين نمجّد إسمك القدّوس هلّق وإلى الأبد، آمين.

المسبحة
مسبحتنا الليلة صلاة وتأمّل بمقطع "زيارة العذراء مريم" يللي بينقرا بهيدا الزمن: زمن الميلاد المجيد، من بعد البشارة. هالمقطع مأخود من إنجيل لوقا الفصل 1، وبيخلّينا نفكّر بكل يوم من حياتنا ويننا من خدمة القريب الصامتة ونتعلّم من فضائل العدرا مريم. منصلّي اليوم مع مريم إمنا "الممتلئة نعمة"، لنعرف نحب الله من كل قلبنا ونحب القريب من دون مقابل، بلا حدود وبلا شروط.

البيت الأول: قوة الروح القدس والاستعداد للخدمة
"وفي تلكَ الأيام، قامت مريم وذهبت مسرعةً إلى الجبل، إلى مدينةٍ في يهوذا. ودخلت بيت زكريّا، وسلّمت على أليصابات."
نعم يا رب، شو عم نحمل لخينا الإنسان اليوم؟ وين مبادرتنا واستعدادنا للخدمة بصمت؟ وين التعب من أجل راحة الآخر؟ قديش مدى الحماس الرسولي عنا؟ يا رب كل واحد منا اختبر حبّك بلحظة معيّنة وولدت بقلبو وهون ذكرتو إنو روحك القدّوس جوا عايش بداخلو، وعيّنا عن جديد اليوم لمحبتك، حطّ فينا قوّة القيامة، خلّينا ننطلق للآخر بتواضع وإخلاء ذات متل مريم. منصلي تيوصل سلامك من خلالنا لكل حدا منلتقي في لحتى يسبح ويبارك إسمك ويختبرك هو بدورو.
مع مريم إمنا، يللي ممتلئة نعمة ويللي قالت " أنا خادمة للرب" كل حياتها، مريم يللي عرفت تزيح على جنب كل مديح وإكرام من الملاك وركّزت على خدمة أليصابات العجوزة وانطلقت حاملة يسوع كل الفرح، علّمنا ننسى ذاتنا كل يوم وننطلق للخدمة، آمين.

البيت الثاني: إمتلاء من الروح القدس
"ولمّا سمعت أليصابات سلام مريم، إرتكض الجنين في بطنها، وامتلأت من الروح القدس."
سلام من مريم من دون كلام، كان كافي لتنتلي أليصابات من الروح القدس وليرقص يوحنا من الفرح.
نعم يا رب، من شو عم ننتلي اليوم؟ شو عم نسمع ونقرا بيوميّاتنا؟ شو عم بيفوت على داخلنا؟ مين الأشخاص يللي عم نقضّي معن وقت؟ وعلى شو عم نقضّي وقتنا؟ يا رب منشكرك على كل شي عطيتنا اياه بساعدنا إنّو نلتقي فيك، نملي من أسرارك، ننتلي من روحك القدّوس، لحتى يقطع رباطات خطايانا. مع مريم إمنا، منصلّي على نيّة كل الأشخاص المعمّدين يللي بعاد عن الكنيسة تيوعوا لقيمة الروح القدس اللي فيُن ويعرفوا وين يفتشوا على الحقيقة وعلى نيّتنا نحن يللي أوقات كتيرة ما عم نعرف نعيش الفرح بالرغم من ظروفنا شو ما كانت، اعطينا قوة البشارة حط فينا فرحك وسلامك تننقلو للمحزونين والمتعبين والمرضى والمتألمين.

البيت الثالث: مريم أعظم إمرأة في التاريخ وأول بيت قربان
"فهتفت بأعلى صوتها وقالت: "مباركةٌ أنتِ في النّساء، ومباركةٌ ثمرةُ بطنكِ!"
نعم يا رب، مع أليصابات بدي إمدحك وأشكرك من بعد سلام التعظيم يللي إجا من عند الملاك جبرائيل من عند الآب، بيجي كلام أليصابات من الروح القدس تيبارك مريم والدة الإله.
مريم هي أول بيت قربان وهي مسكن لإلك.
منشكرك بالأخص اليوم على سر الافخارستيا يللي من خلالو بتسمحلنا نحنا نحملك وننقل هالفرح لإخوتنا. منشكرك يا رب على مريم وعلى صلاة المسبحة.
مع مريم يللي كل الوقت عم تصلي وتتأمّل وتحب وتخدم ويللي كلامها كتير قليل بحياتها على الأرض إنّما بتشفع فينا عندك بالسما، منصليلك على نية الكنيسة المتألّمة وخلاص النفوس وعلى نية كل الأشخاص يللي عم يمرقوا بألم لتقوين ليتحمّلوا الضيق الخفيف العابر يللي ما بيوازي المجد يللي ناطرنا بالملكوت وعلى نيتنا نحنا لنعرف نخفّف أوجاع بعض بوقفتنا حد إخوتنا، آمين.

البيت الرابع: تكريم مريم والدة الإله وعظمة سر التجسّد
"ومن أين لي هذا، أن تأتي إليَّ أمُّ ربّي؟
فها منذُ وقعَ صوتُ سلامكِ في أذُنيَّ، ارتكضَ الجنينُ ابتهاجاً في بطني!".
"لا يستطيع أحد أن يقول إنّ يسوع ربّ إلّا بالروح القدس". 1كو 12/ 3
نعم يا رب، مع أليصابات منعترف إنّو نحنا ما منستحق إنّو تجي لعنّا وما منستحق إنو تفوت على بيتنا.
سامحنا يا رب إذا كنّا بعد مش مدركين عظمة نعمة تجسّد إبنك، إذا بعدنا منلتهي بأمور تانية متل مديح الأشخاص لإلنا والكرامة وحب المال والمقتنيات. إلك كل الشكر والتسبيح يا رب لأنّك رضيت عنّا عن جديد بتجسّد إبنك يسوع وبصليبه وموتو وقيامتو بتخلصنا.
مع مريم يللي بتستحق كل تكريم، قوّينا يا رب بشفاعتها حتى نقوى على كل شرّ بيعترض حياتنا. خلينا نهرب من أسباب الخطية ونواجه الشرّ بعمل الخير، آمين.

البيت الخامس والأخير: الإيمان والفرح الحقيقي بتتميم مشيئة الله
"فطوبى للَّتي آمنت أنَّهُ سيتمُّ ما قيلَ لها من قبَل الربّ".
نعم يا رب، دور العدرا كبير بمشروع الخلاص، بكل حريّة قبلت مشيئة الله وبقيت مع يسوع حتى الصليب برجا كبير بالقيامة. منشان هيك منصلّي لحتى على مثالها نحنا نوعى لأهميّة دورنا بخلاص نفوسنا وخلاص نفوس يللي بقربنا ولحتى يبقى إيماننا ثابت وفرحنا متعلّق بس بعلاقتنا فيك.
مع مريم إمنا، منصليلك يا رب على نية عيلة مار شربل بالأخص ليبقى إيمانها ثابت فيك إنتَ يللي سلّمتها رسالة كبيرة مؤتمنين عليها بصدق وأمانة بقلب كنيستك والعالم، آمين.