زمن الميلاد المجيد 

مقدمة القداس
القديس لوقا بقلنا بإنجيلو "سمِّيَ يسوع" والقديس بولس بقلنا برسالتو "هو سلامنا".
يسوع المسيح.... هو سلامنا.
اليوم السلام غايب عن كتير من القلوب وكتير من العيَل وكتير من البلدان. اليوم في وجع كتير وخوف كتير نتيجة النزاعات والصراعات.
اليوم منصلِّي، منبدا أول أسبوع بالسنة بالصلاة من هالمكان المقدَّس:
ربِّي يسوع، إنتَ وحدك سلامنا. بارك سنتنا الجديدة وخلِّيا تكون سنة بركة وسلام. خلِّي ملكوتك يملك بالبشرية، ملكوت الحقّ والعدل والحريّة والمحبّة. إنزع من قلوبنا كلّ ضغينة، وكل حقد وكلّ لا مبالاة.
ربِّي يسوع، ملِّينا من روحك القدُّوس، تنكون رسل وفاعلي سلام ببيوتنا ومجتمعنا والعالم كلُّو... بشفاعة إمك مريم والقديس شربل.
الكهنة بكراسي الإعتراف لحتَّى نصفِّي قلوبنا، ونتجدَّد بالمسيح ويملِّينا من سلامو.

قداس مقبول من الجميع.

النوايا
نية الوطن والعالم
بأول أسبوع من السنة ، منوضع يا ربّ على مذبحك كلّ حكّام العالم وخاصةً المسؤولين بوطنّا، تيولدوا من جديد بحلّة أبناء الله، ينتلي قلبن رحمة ومحبِّة وعطاء، ويعاملوا الشعوب بعدل وكرامة وإحترام ليعمّ السلام بالعالم.

بشفاعة إمنا مريم وبي عيلتنا مار شربل منسألك يا ربّ

نية الإنجيل
"فلستم بعدُ غرباء ولا نزلاء، بل أنتم أهل مدينة القدّيسين وأهل بيت الله."
منصلّي يا ربّ لنحافظ على النِّعمة اللي اعطيتنا ياها نكون أهل بيت الله. نعيش الأخوّة، نحبّ كلّ النّاس بدون تمييز، نعيش التواضع ونسامح ونغفر لبعضنا البعض.

بشفاعة إمنا مريم وبي عيلتنا مار شربل منسألك يا ربّ

نية العيلة والمكرسين مع نية البابا
منرفعلك يا ربّ كلّ إنسان كرَّس حياته للخدمة والبشارة بكلمتك ومنخص الرهبنة اللبنانية المارونية.
خلّي عينك عليا وبيمينك احفظها، ومنرفعلك عيلة مار شربل نحنا لي أخدنا القديس شربل شفيع وبي إلنا. ساعدنا لنكون على مثاله بحياتنا، نعيش إنجيلك بجذريته.  

بشفاعة العدرا مريم ومار شربل منسألك يا ربّ

سلة النوايا
عامة
بهالمسا المبارك وبهالمكان المقدَّس وبأوَّل أسبوع من سنة جديدة ليلة بيضا بتحكي عن جمال الخالق وعظمة عمل يديه.
منرفعلك يا ربّ نوايا الجماعة الحاضرة، منسألك قلوب جديدة بيضاء تزينا وتجددا.
منسألك رجا وسلام جديد بوطنَّا.
منسألك مواليد جدد لكل الناطرين عم يترجُّوك.
منسألك فرح جديد بكل بيت وعيلة عم بتعاني صعوبات.
منسألك نعم جديدة متجددة لكل شخصين عم يتحضَّروا لسرّ الزواج.
منسألك تجدّد عملك بشبيبتنا وتزرع فين القوّة للثبات فيك وعدم الإنجرار خلف تيارات العالم.
منسلمك بهالسنة الجديدة يا ربّ كلّ شي قوِّينا لنتخلّى عن كلّ شي بيبعّدنا عنّك ونجدِّد وعدنا إلك إنت الِّلي حقّقت كلّ وعودك ورفعتنا.

بشفاعة العدرا مريم ومار شربل منسألك يا ربّ

مرضى:
بمطلع هالسنة الجديدة ما مننسى يا ربّ المتألمين والمرضى إنتَ الِّلي انحنيت على بشريتنا الضعيفة ولبست جسدنا تعا ارفع كلّ مرضانا من شدِّتن واعطين النعم اللي بحاجة لإلها
مناخد لحظات صمت منذكر كلّ مرضانا...
مطرح ما بيعجز الإنسان بيلاقي عندك إنُّو ما في مستحيل اشفين يا ربّ إذا أردت.

بشفاعة العدرا مريم ومار شربل منسألك يا ربّ

موتى:
سنة ورا سنة كل شي هون عم يخلص، كتار يا ربّ من أحبابنا من سنة كانوا واليوم غابوا كتار سبقونا لعندك اليوم ما مننساهم منصليلك لحتى يكونوا مرتاحين بقلبك عندك ببيتك مطرح اللي ولا شي بيخلص.

مناخد لحظات صمت منذكر موتانا....

شكران:
بمطلع سنة جديدة منشكرك أيها الآب على نعمة الحياة اللي عم تعطينا اياها بمجّانية وبوفرة.
منشكرك يا أمير السلام يا إبن الله إنت اللي تجسّدت لتحرّرنا من الخوف والقلق وتعطينا السلام الحقيقي اللي ما بزول، فتحتلنا باب السّما وصالحتنا مع الآب.
منشكرك يا روح الله القدُّوس يا روح السلام والفرح تعا واملك على قلوبنا لنقدر نغيِّر حياتنا ونغيِّر قلوبنا بهالسنة الجديدة.
منشكرك أيُّها الثالوث على كلّ لحظة من لحظات حياتنا وهبتنا اياها، على كلّ لحظة فرح وحب وصحة وسلام عشناها وسامحنا على كلّ إساءة ولامبالاة وغضب وحقد شعرنا فيه، بارك إيّامنا الجايه بارك عيلتنا ووطنا وكون حاضر فينا وبأفكارنا وأقوالنا وأعمالنا حتى ما تكون نهايتنا بالتراب ونستحق بداية بسماك. إلك المجد وللأبد. آمين

المسبحة - الدنح
مقدمة:
موضوع تأملنا الليلة هوَ الدنح أي الظهور واعتماد الربّ يسوع على يد يوحنا

التأمل الأول:        
أنا أعمّدك بالماء، ويأتي مَن هو أقوى منّي، مَن لستُ أهلاً أن أحلَّ رباطَ حذائه".
شاف الله أنّه حان الوقت وتم الزمان فنزل على أرضنا. إجا لعنّا سكن بيننا وكان قراره واضح: خلاص الإنسان من ظلمة الموت. تجسد طفل صغير، تربّى بعيلة، ترعرع بين أمّ وبيّ صالحين بارّين قدّيسين، علّموه، كبّروه، ربّوه على الصلاة. "وكان ينمو بالقامة والحكمة والنعمة". ولمّا آن الأوان للرسالة العلنيّة أرسل قدّامه يوحنّا يحضّرله هالشعب، يحضّر عمل الله ويسّهله، لحتّى لمّا بيطلّ الربّ يسوع يختفي هوِّ.
ونحنا اليوم من بعد ما وصلتنلنا البشارة وعرفنا الرسالة، بكل عمل عم نعمله هل عم نحضّر ونسهّل لعمل الله أم عم نعمل لإرضاء رغباتنا وكبريائنا. هل عم نحبّ اخوتنا ونرغب نوصّلهم الله.

منصلّي هالبيت الأول من المسبحة على نيّة الشعب المسيحي ببلدنا لحتّى يفتح قلبه لالله ويمشي بالنور. آمين.

التأمل الثاني:
"هو يعمّدكم بالروح القدس والنار. في يده المِذرى ينقّي بها بيدَره فيجمع القمحَ في أهرائهِ وأمّا التبنَ فيحرقه بنارٍ لا تُطفأ."
يوحنّا عمّدَ الشعب معموديّة التوبة ليحضّر هالشعب للمعموديّة الحقيقيّة اللي رح ننالها من الربّ الإله المتجسّد، معموديّة الروح القدس والنار. يوحنّا يللي سمّاه الربّ أعظم مواليد النساء، افتكره الشعب إنّه هوِّ المسيح لكن يوحنّا قلّن أنا بعمّدكم بالماء، معموديّة توبة ومغفرة الخطايا لكن اللي رح يولدكم من جديد، اللي رح يموت معكم لتقوموا معه، هوِّ جايي يعطيكم الحياة. يوحّنا ظنّ، مثله مثل الشعب القديم ومثل ما كتار منّا لليوم بدّن، إنّه المسيح جايي إله جبّار بقوّة بشريّة يحرق الأشرار ويقضي عليهم. بس يسوع ما إجا ليقضي عليهم إجا ليخلّص الخطأة.
ونحنا هل عم نحلم بهيدا الإله القوي بمفهومنا البشري إم دخلنا عمق سرّ الله وفهمنا عظمة وقوّة المحبّة يللي بتحيي.

منصلّي هالبيت من المسبحة على نيّة كل اللي بعد فيه حقد بقلبن وبعد ما قدروا يحبّوا إخوتن القراب منُن يللي بعد ما بيعرفوا المسيح الحقيقي. آمين.

التأمل الثالث: 
"وبأقوال أخرى كثيرة كان يوحنا يعظ الشعب ويبشّرهم".
حلو قدّيش يوحنّا آخذ الموضوع بجديّة وقابض الله جدّ. رسالته كرّسلها كلّ حياته ليتمّمها. وكان صادق وأمين. وقال الكلام اللي لازم يقوله وكلامه كان ثقيل على يللي عايش بالظلام.
ونحنا يللي تعمّدنا معموديّة الروح، نحنا يللي ما عدنا غرباء عن بيت الله بل صرنا أبناء ومن أهل بيت الربّ وصرنا من عيلة الثالوث. كيف عم نتصرّف؟ وجه مين عم نعكس؟ هل مبيّن علينا من أي عيلة نحنا؟.

منصلّي هالبيت من المسبحة على نية كل العيل لحتى يربّوا ولادهم تربيه مسيحيّة مبنيّة على القيم والأخلاق والمحبّة، على يسوع، ويكونوا إلُن قدوة بالإيمان. آمين.

التأمل الرابع:         
"لكن هيرودس رئيس الربع، وقد كان يوحنّا يوبّخه من أجل هيروديّا امرأة أخيه، ومن أجل كل الشرور التي صنعها، زاد على تلك الشرور كلّها أنّه ألقى يوحنّا في السجن".
ولمّا بيكون الخير عن يشتغل لخلاص النفوس وعودتها لعند الله، بيشتغل الشرّ ليعرقل. هيرودس كان كلام يوحنا ثقيل عليه لأنّه عايش بالظلام وما بدّو يطلع من الظلام. فكّر إنّه يخلص من يوحنّا، يعرقل عمل الله ويسكّت كلمة الله ويفطس عمل الروح.
لكن عمل الله ما حدا فيه يوقف بوجّه. إذا انت ما ساهمت بتتميمه رح يجي غيرك يساهم. عمل الله الخلاصي بدّو يتمّ وكنيسة الله على الأرض قوّات الجحيم لن تقوى عليها.
ونحنا المعمّدين اللي لبنسا الله واخترنا الله. يللي عم منموت كل يوم عن خطيّتنا لنقوم كل يوم مع المسيح هل عم نكون رسل بوطنّا، بأرضنا، رسل محبّة وسلام ومصالحة.

منصلّي هالبيت على نية السلام بوطنّا وعلى نية كل فاعلي السلام.

التأمل الخامس:
"ولمّا اعتمد الشعب كلّه واعتمد يسوع أيضاً وكان يصلّي انفتحت السماء ونزل عليه الروح القدس في صورة جسديّة مثل حمامة وجاء صوتٌ من السماء يقول: "أنتَ هوَ ابني الحبيب بكَ رضيت".
صلّى يسوع وانفتحت السماء. وأنا وانتَ وإنتِ كلّ مرّة منصلّي بتنْفِتِح السماء. صلّي يسوع ليظهر وجه الله وكان صوت الله عم بيدّلنا عليه "هيدا هوِّ ابني الحبيب"...
وهبط الروح القدس وكان ظهور للثالوث بيعرّفنا على هويّة ابن الله. ونحنا كلّ مرّة عم منصَلّي هل عم ننتبه لصوت الله، هل عم نفتح نفسنا لروح الله، هل عم نعرف هويتنا. صلّى يسوع ليظهر وجه الله: أنت ليش عم بتصلّي.

منقدم هالبيت من المسبحة على نيّة كل المكرّسين، على نية كل جماعات الصلاة، على نيّة عيلة مار شربل، لحتّى تضل جماعة صلاة وما ننسى ولا مرّة معموديّتنا ليظهر وجه الله ونسمعه عم بيقول لكم واحد منّا "انت ابني الحبيب بك سررت". آمين.