مقدمة القداس
"أنت هو ابني الحبيب بك رضيت"

عيلة مار شربل بترحب بكل الحاضرين معها وخاصة ليللي عم يشاركوها لأوّل مرّة.
اليوم عيد الدنح أو الغطاس أو عيد الظهور الإلهي الآب والإبن والروح القدس في عماد الرب.
يسوع عندما غطس بنهر الأردن قدّس المي والطبيعة والإنسان.
لكل اللي بيحبّوا يعيشوا نعمة المعالجة بهالعيد والزمن المقدّس الكهنة ناطرينا بكراسي الإعتراف. قداس مقبول

نية الوطن والعالم مع نية الإنجيل
منصليلك يا ربّ على نيّة الحكّام والمسؤولين ليكونوا أُمَناعلى رسالتن وتعطيُن الحكمة ليعرفوا إنّو كل سلطان هوّي منّك. نوّرن حتّى يعاملوا الشعوب بمحبّة ويسهروا على تحقيق واجباتن. ويتذكّروا دايماً وجودك وإنّو رح يوقفوا قدّامك ورح يتحاسب كل واحد بحسب أعمالو. بشفاعة إمنا مريم وبي عيلتنا مار شربل منسألك يا ربّ.
"تكفيك نعمتي لأنّ قدرتي تكتمل في الضعف"
منصليلك يا ربّ حتّى بقوّة روحك القدّوس نفهم ضعفنا البشري، وما يكون هالضعف حجّة للخطيّة. نتواضع ونتّكل على قوتك فينا، حتّى تتجلّى نعمتك بحياتنا ونردّد مع مار بولس تكفيك نعمتي. بشفاعة إمنا مريم وبي عيلتنا مار شربل منسألك يا ربّ.

نية العيلة والمكرسين
منصلي على نية الكهنة والرهبان والرهبنة اللبنانيّة المارونيّة حتى يكملوا مشوار القداسة لي بلّشو معك بثبات وأمانة وحكمة.
منحط بين إيديك عيلة مار شربل، الأشخاص يلي التزموا فيا والأشخاص يلي بلشوا مشروع التكرّس فيا. ملّينا من روحك القدّوس
واعطينا إنّو نكون متل ما وصّانا بينا مار شربل رهبان بقلب العالم.
بشفاعة إمنا مريم العدرا وبينا مار شربل منسألك يا رب.

سلّة النوايا

عامة:
ببداية هالسنة الجديدة وبهالعيد المبارك، دايم دايم حضورك علينا يا ربّ.
من محبتك تنازلت عأرضنا وصرت إنسان، وفِرحت الأرض وابتهجت كل مخلوقاتنا. منصلّيلك تتبارك أرضنا وخيراتنا ووطننا.
دايم دايم روحك القدّوس تا يجدّد عمادنا، ومن ميرونك تداوي خطايانا وتنوّر قلوبنا تا تصير نقيّة ومليانة حبّ.
عامذبحك، منوضع بين إيديك سلّتنا وهمومنا وكل نوايا القلب تا تباركهم وتنعم عليهم بحسب مشيئتك.
دايم دايم، بركتك يا ربّ، على كل شاب وصبيّة عم يتحضّروا ليأسوا عيلة جديدة، حقّق صورتك فيهم تا تكون إنت الأساس بيناتهن.
دايم دايم، دنحك يا ربّ ينوّر كل ينوّر كل عيلة مفكّكة ويضوّي على عتمة كل بيت عم يمرق بصعوبة.
عمّدهن بالروح والنّار ونمّي فيهم الإيمان والثبات والمحبّة.
دايم دايم، يا معطي الحياة، منصلّي تا يشرق فرحك على كل عيلة ناطرة نعمة طفل، تا تكبر وتنمى بالصلاة والرّجا والتواضع على مثال عيلتك، عيلة الناصرة.
إستجب يا ربّ كل تضرعاتنا وخلّي حُبّك، دايم بقلبنا.
بشفاعة إمنا مريم وبي عيلتنا مار شربل منسألك يا ربّ.

المرضى:
دايم دايم، حنانك يا ربّ، تداوي كل مريض ومتألّم بالنّفس والجسد وخاصّة الأمراض المستعصية، منسألك بإيمان تعطيهم نعمة الصبر. مناخد لحظات صمت ومنذكر مرضانا...
منوكل مرضانا يا ربّ لعنايتك الأبويّة، بشفاعة إمنا مريم وبي عيلتنا مار شربل منسألك يا ربّ.

الموتى:
دايم دايم، رحمتك يا ربّ من أجل موتانا والأنفس المنقطعة والمطهريّة وكل الشهداء. واللي بعدون عم يستشهدوا من أجل إسمك، منصلّيلون تا يكونوا عم يتنعّموا بوجّك السّماوي وينالوا إكليل المجد والسّلام الدّايم معك. مناخد لحظات صمت ومنذكر موتانا...

شكران
بختام هالذبيحة المقدّسة، منشكرك يا بيّنا السّماوي على وقت اللقاء فيك. منشكرك لأنّك بتقبل ضعفنا وبتغفرلنا عند كل خيانة لعهدك. منشكرك أكتر لأنّو معك على طول في بدايات جديدة.
يا ربّي يسوع، من يوم اعتلانك بطّلت الدني موجودة لأنّك إنت صرت كلّ الدني، إنت اللي تجسّدت بأرضنا وظهر مجدك على نهر الأردن منشكرك. ولأنّك بتتضامن معنا نحنا الضعاف لتنقلنا من كلّ لحظة موت للحياة الوافرة بقربك، منشكرك.
يا روح الله اللي حاضر فينا وسهران علينا منشكرك عا كلّ مرّة بتذكّرنا إنّا أبناء الملكوت وبتوعّينا لتكون أعمالنا بتتطابق مع مشيئتك، منشكرك.
يا أيّها الثالوث القدّوس، منوعدك نجتهد بحقلك لنستحق هالمحبّة الكبيرة المجّانيّة الغامرنا فيها، إنتَ اللي أمين عوعدك اعطينا القوّة لنبقى نسبحك ونمجدك ونشكرك من هلّق وللأبد، آمين.

مسبحة

البيت الأول
قال يوحنا المعمدان: "أنا أعمّدكم بالماء ويأتي من هو أقوى منّي من لست أهلاً أن أحلّ رباط حذائه. هو يعمّدكم بالروح القدس والنار".
يوحنا شهد للمسيح الجايه، شهد للنور، عرف إنّو اللي جايي بعده هو أعظم منّه وبدّه يمهّد لو الطريق، فهم إرادة الله وانصاع بكل كيانه لتحقيق هالمشيئة.
رائع يوحنا بتواضعه وفهمه، رائع بثباته بحبّه واندفاعه، ما في شي فصلو عن كلمة الحقّ والدعوة للتوبة وتمّم المطلوب منّه بكل أمانة.
اعطينا يا ربّ تواضع وطواعيّة يوحنا، اعطينا نعرف حجمنا ورسالتنا ونعمل كل شي لمجدك مش لمجدنا.
منصلي هالبيت الأول من المسبحة على نيّة كل المكرسين والمكرسات ليختبروا حبّك ويخبروا عنّك، يختبروا فرح لقاءك ويدلّوا النّاس عليك ليعرف العالم كلّه فرحك وخلاصك، آمين.

البيت الثاني
"لكن هيرودس رئيس الربع، من أجل الشرور التي صنعها، زاد على تلك الشرور كلّها أنّه ألقى يوحنا في السجن".
يوحنا شهد للحق وكان سراج يضوّي في ظلمة هالعالم، بس الإنسان أمس واليوم هو هو، غليظ الفهم، متكبر رافض التوبة والتخلّي متمسّك بأمجاد الهالم اللي بتخدعه دايماً وقاعد بالظلمة ما بدّو يتحرّر.
ولكن إنت الدايم الدايم جيت لحتّى كل إنسان يسمع صوتك ويآمن فيك.
يا نور اللي جيت عالمنا قوّي إيماننا بهالعالم المظلم الضّال اللي مش عم يعرف شو عم يعمل، نوّر طرقنا ونجّينا من فخّالعالم لنعيش بكل وقت بعنايتك ورضاك.
منصلي هالبيت التاني من المسبحة على نيّة عيالنا، دخول يا رب بيوتنا، طرود منها كلّ حزن وخطيّة حلّ على شبيبتنا روحك القدّوس ونوّر بصيرتهم ليوعوا على حقيقة دعوتك ويرجعوا لعندك تايبين، آمين.

البيت الثالث
"ولمّا اعتمد الشعب كلّو، اعتمد يسوع أيضاً".
إجا يسوع، إجا الدايم دايم، إجا بالآخر، آخر الناس، هو الموجود قبل كل موجود، هو الخال يمن الخطيّة، حسب نفسه متل أي واحد منّا، نحنا الخطأة الضعاف ونزل ليرفعنا، قدّس الماي ليقدّسنا نزل ليقلنا إنّو رح يموت. قام ليفرجينا كيف نموت معه بالمعموديّة عن كل شي ببعّدنا عنّه لنقوم معه للحياة.
يا ربّ يا سيّد الأرض والسما، سيّد الكواكب والجبال والماي، تمّمت كل شي لتصالحنا مع الآب وتعلّمنا كيف نمشي مسيرة تطهّر وتوبة وتجدّد لنرجع لقلب الآب أبانا.
منصلي هالبيت التالت من المسبحة على نيّة كل واحد منّا غسول يا ربّ قلوبنا من أحقادها وكبرياءها وأنانيتها وعمّدنا باسم روحك القدّوس ليبقى حضورك دايم دايم بحياتنا، آمين.

البيت الرابع
" كان يسوع يصلي فانفتحت السماء ونزل الروح القدس في صورة جسديّة مثل حمامة"
صلّيت يا ربّ وانفتحت السما من بعد ما سكّرتها الخطيّة. انفتحت وما بقى رح تتسكّر واتجلّى الثالوث، الروح اللي حلّ عليك عم بقلنا معك رح يصير في حياة جديدة للناس، معك ومن خلالك رح نصير أبناء للآب.
يا روح الرب الساكن بـأعماقنا، تع الليلة جدّدنا واخلوق فينا قلب جديد نقّي وصافي، تع وجدّد عالمنا بيوتنا ومجتمعنا واحمِ وطننا من كمّ الجهل والموت والقتل اللي عم يرتكب بحقّ كل جمال ونعَم ومقدّسات، وحدك يا روح الله القدّوس قادر تجدّد الدني بطريقة مختلفة.
منصلي هالبيت الرابع من المسبحة على نيّة عيلة مار شربل اعطينا يا رب ننتلي من روحك تنحمل مسؤوليّة تجديد العالم ونوجهه بما يلاءم رغبتك يوم اللي قلتلو للعالم: كن فكان.

البيت الخامس
وجاء صوت من السماء يقول:" أنت ابني الحبيب بك رضيت".
أنتَ يا يسوع مصدر فرح بيَّك، إنتَ خادم الرب الحقيقي يللي توصل بطاعتك للآب لأقصى حدود الحبّ، للصليب.
عرفت يا إبن الله الوحيد إنّو البنوّة مش بس فخر هالبنوّة هي رسالة، رح تواجه أبناء العالم لتصيّرهم أبناء الله وتحمّلن صليب الحبّ.
يا ربّ، يا خالق الإنسان وجابلو علّمنا كيف نتصرّف كأبناء للآب مخلَّصين، نتبعك ونخبّر عن فرحك نشهدلك بعالمنا نموت عن كلّ شي ببعدنا عنّك، نموت عن الخطيّة ومغريات هالعالم نقوم كلّ يوم معك متجدّدين للحياة لنسمع صوت الآب عم بقلنا أنت إبني الحبيب بك رضيت، آمين.