قداس اسبوع الأبرار والصديقين - عيد مار مارون

المجد لله ...
بأسابيع التذكارات وقبل عيد شفيع كنيستنا المارونية القديس مارون هالناسك اللي كان مثال الحياة النسكية حتى ذاع صيت فضائلو بأقاصي العالم وصار غنيّة حب بين السما والأرض وصلت نغماتها لكل مؤمن وراهب وناسك.

بهالمناسبة منعيّد كنيستنا المارونية وخاصة الرهبنة اللبنانية المارونية وكل الرهبانيات والحبسا وكل مين بيحمل إسم مارون طالبين شفاعة هالقديس العظيم تيحمي بلادنا وولادنا ويرحم الكهنة اللي رافقونا بمسيرة عيلتنا وعطيونا من صلاتن وعلمن ولاهوتن

متل كل نهار جمعة منتلاقى حول مذبح الرب رافعين صلاتنا من أجل الجماعة الحاضرة
منرحّب بالجميع وخاصة المشاركين معنا للمرة الأولى.
الإعترافات مؤمنة بكراسي الإعتراف حتى نفتح قلوبنا للنور اللي شعّ ع قبر القديس شربل.
سلّة النوايا موجودي ع طرف المذبح.

عيد مبارك وقداس مبارك ومقبول من الجميع.

نيّة الوطن:
"كُلُّ شَجَرَةٍ صَالِحَةٍ تُثْمِرُ ثِمَارًا جَيِّدَة"
منصلّي يا رب على نيّة وطننا لبنان مسؤولينه وشعبه. أعطي يا رب أبناءه نعمة الإيمان بلبنان وبرسالته بالشرق. وعيّنا كلّنا، مسؤولين وأفراد، على أهمّية هالإرث، نجاهد ونحافظ على عطيّتك المقدّسة ونكون ثمر صالح. وبذكرى عيد مار مارون منصلّي يا رب على نيّة عيلتنا، عيلة مار شربل. إحفظها يا رب بالحق وقوّي رباط المحبّة بين أفرادها تا نكون على مثال مار مارون و بيّ عيلتنا مار شربل تلاميذ وشهود من محبستنا نزرع لبنان صلاة وبخور.
بشفاعة العذراء وبيّ عيلتنا مار شربل منسألك يا رب.

نيّة الإنجيل:
"فَكُلُّ مَنْ يَسْمَعُ أَقْوَالي هذِهِ، ويَعْمَلُ بِهَا، يُشْبِهُ رَجُلاً حَكِيْمًا...
منوضع ذواتنا يا رب بين إيديك طالبين منّك الحكمة تا نميّز صوتك ومشيئتك. طالبين منّك تقوّي إرادتنا تا نتشجّع ونقوم لخدمتك بين إخوتنا. طالبين منّك تثبّتنا بإبنك الكلمة والجسد تا يكون بنياننا صخر ما بتزعزعه ضربات هالعالم لأنّه قلبه مش بهالعالم ورجاءه بإبنك يسوع المسيح يلّي غلب العالم.
بشفاعة أمّنا مريم ومار شربل منسألك يا رب.

المكرسين وعيلة مار شربل
منصللي بإيمان ورجا على نيّة المكرّسين والمكرّسات لخدمتك يا رب. ومنخص بالذكر الرهبانية اللبنانية المارونية لتبقى أنظارُن مرفوعة صوبَك، زيدن معرفة وحكمة وقداسة ليكونوا قدوة ورعاة صالحين، يخدموك بكل أمانة لنشر كلمتك، ومنصللي على نيّة عيلتنا، عيلة مار شربل، أعطينا النعمة من روحك القدوس، نستنير من نورك لنعكس نور مجد الإلهي.
ثبّتنا بمحبتك علّمنا التواضع والتسليم التام لمشيئتك الإلهية.
بشفاعة إمنا مريم العدرا وبيّ عيلتنا مار شربل منسألك يا رب

سلة النوايا
يا ربّ متل كل ليلة جمعة عم تدعينا تنتشارك بوليمتك السماوية ومنجي حاملين معنا نوايا كل اللي طلبوا صلاتنا من لبنان وخارج لبنان متكلين على عنايتك ورحمتك والليلة بعشية عيد بيّ الطايفة المارونية مار مارون منطلب منك تقوينا تنمشي على خطاه ويكون مثال إلنا نتعلم منه الإستسلام لمشيئتك، والطاعة لتعاليمك نعيش التقوى ونكون أمناء لدعوتنا
ومع إستعدادنا لزمن الصوم المبارك منصليلك حتى يكون هالزمن عودة للذات وإنطلاقة جديدة بإيمان أقوى وأعمق وحالة تجديد لنختبر سر المحبة اللي كل يوم عم يحكينا  بإنجيله
منصلي يا رب من أجل ثبات ووحدة عيالنا وبالأخص العيل اللي عم تمرق بظروف صعبة
بارك خطوة كل شخصين عم يتحضروا لتأسيس عيلة تيكون إرتباطهم لخدمة مشروعك وتمجيد إسمك
ما تخيب يا رب أمل ورجا كل عيلة طالبة منك نعمة طفل لأنك إله بتعطي الحياة بوفرة
منرفعلك شبيبتنا وأطفالنا إحميهم يا ربّ من  كل ضلال وثبتهم فيك حتى يتخطوا بتقوى وإيمان كل المغريات ويكونوا متل حبة الحنطة المزروعة بالأرض عم يعطوا ثمار سلام ومحبة
بشفاعة بينا مار مارون ومار شربل منسألك يا ربّ

المرضى
يا رب بنعمة منك عطيت سلطان الشفا لمار مارون وكانت الصلاة هي الدوا  الوحيد الشافي لكل الأمراض، منطلب منك بشفاعته تشفي كل مرضانا وتهدي كل الضالين وترجّع الخاطيين
مناخد لحظة صمت منذكر مرضانا وبالأخص الأسماء اللي بالسلة وبقلوبنا
يا رب إنت بتعرف رغبة مرضانا عطيهم كل شي بوافق خلاصهم وثبتهم عدرب القداسة
بشفاعة بي عيلتنا مار شربل،  مار مارون وإمنا مريم منسألك يا رب

الموتى
يا رب مشيئتك أنو يخلص كل إنسان مؤمن، بأسبوع تذكار الموتى تعطف يا ربّ على كل موتانا اللي سبقونا، والنفوس المنقطعة والمطهرية امنحهم فرح اللقاء بوجك ويكونوا من عِداد مختاريك
مناخذ لحظة صمت منذكر أمواتنا
عاملهم بالرحمة تيلاقوا الراحة الأبدية
بشفاعة مار مارون ومار شربل منسألك يا رب

الشــــــــــكران
منشكرك يا رب لأنك اخترتنا من قبل إنشاء العالم لنكون أبناء لإلك، خلقت الكون وهندسته كرمالنا، وبالأرض حطّيت الحياة وكل الجمال، وعلى صورتك ومثالك خلقتنا، على عظمة أعمالك إلنا يا بينا السماوي منشكرك.
بإرادتك على الأرض نزلت وجسدنا لبست، وبمشيئتك على الصليب ارتفعت وبجسدك انهنت، تحمّلت العذاب والفقر بمسيرتك على الأرض، لتحمينا وتخلّصنا من بعد مسيرتنا بهالحياة.
على جسدك ودمّك اللي قدمتن وبعدك عم بتقدّمن كل يوم لخلاصنا يا يسوع المسيح منشكرك.
لو الأم بتنسا رضيعا، إنت ما بتنسانا لو البي بينكر ابنه إنت ما بتنكرنا، ولو نحنا تركناك وبعدنا عنّك إنت مش ممكن تبعد وتتركنا، على حبّك إلنا وسهرك علينا يا روح الله منشكرك.
على أبينا مارون هل الناسك العظيم وعلى كنيستنا وقدّيسينا يا ربنا وإلهنا منشكرك.
وعدنا إلك يا رب نسعى لنكون حقيقيين صورة ومثال عنك بالعالم، نوعا لعظمتنا وقيمتنا، ونعيش حياتنا بمحبة وصلاة معك ومع إخوتنا لنستحق نورث ملكوتك السماوي.
ومع أبائنا القديسين نشكرك ونمجدك للأبد آمين

مسبحة

المقدمة:
بهالأسبوع تتذكّر الكنيسة الأبرار والصدّيقين يلّلي عاشوا حسب إرادة الربّ. ومسبحتنا الّليلة رح تكون إنطلاقاً من عظة يسوع على الجبل يلّلي احتوت برنامج ملكوت الله الجديد وكيف بيريدنا نكون تلاميذ وأبناء للملكوت.

البيت الأول: لما رأى يسوع الجموع صعد إلى الجبل، وجلس فدنا إليه تلاميذه، وفتح فاه يعلّمهم قائلاً: " طوبى لفقراء الرّوح، فإنّ لهم ملكوت السماوات".
ملكوت الله هو جوهر وهدف رسالة يسوع وبيريدنا كلّنا نكون أبناء هالملكوت.
وأوّل خطوة بيطلبا منّا يسوع هي الفقر مش الفقر المادّي وحدو ولا الفقر الرّوحي وحدو. يسوع بيطلب منّا الفقر الكياني يلّلي فيه بيتخلّى عن روح العالم، روح الطمع والتملّك والإكتفاء والأنانيّة ويكون عنّا روح الحريّة والإنفتاح وقبول كلّ شي كنعمة من الله.
يا ربّ، مش كلنا مدعويّن تنكون متل أنطونيوس وفرنسيس وتيريزا وشربل، عطينا نقبل بتواضع واقع دعوتنا كعلمانيّين ونعيش روح الفقر كرهبان بقلب العالم ونستاهل نكون من أبناء الملكوت، آمين.

البيت التاني: طوبى للودعاء فإنّهم يرثون الأرض.
يسوع أعطانا المثال بالتواضع من ولادتو بمزود حتّى موتو على الصليب. وعرّف عن ذاتو إنّو وديع ومتواضع القلب. ومريم كمان عطيتنا مثال آخر بالتواضع هي يلّلي هتفت: "ها أنا أمة الربّ" وهي يلّلي أنشدت: "حطّ الربّ المقتدرين عن الكراسي ورفع المتواضعين".
بأسبوع الأبرار والقديسين بنصلّيلك يا ربّ بعّد عنّا كلّ كبريا وخلّلي قلبنا مع كلّ دقّة يقلّك: "يا يسوع الوديع والمتواضع القلب، إجعل قلبنا مثل قلبك".

البيت التالت: طوبى للرحماء، فإنّهم يرحمون
يسوع ترجم محبتو إلنا من خلال رحمتو للمريض والمتالّم والجائع وحتّى للخاطي وقلنا: "اريد رحمة لا ذبيحة" اليوم بعالم بتتحكّم فيه المادية والإستهلاك والأنانيّة  وقساوة القلب، بنصليلك يا ربّ تملّينا من محبتك حتّى نعامل بالرّحمة كلّ الأشخاص يلّلي بتوضعن على دربنا خاصةّ الجيعان والعطشان والعريان والغريب والمريض والسجين، آمين.

البيت الرابع: طوبى لأنقياء القلوب، فإنّهم يعاينون الله
القلب هوّي يلّلي بيسمحلنا نشوف الله. ويسوع بقلنا إنّو وحدو صاحب القلب النقي، وحدو صاحب القلب الطاهر وحدو العايش باستقامة  ومحبّة بيقدر يكون قريب من الله وبشوفو. وحدو يلّلي انخفض مع المسيح بالتواضع والطهارة والخدمة والتقدمة بيقدر يرتفع معو ويعاين وجه الله.
يا ربّ، غاية حياتنا إنّو نلتقى فيك ونشوف وجّك المنوّر...بعّد عن قلوبنا كلّ زغل وكلّ ظلمة لحتى بشفاعة الأبرار والقديسين وعلى مثالن نقدر نشوفك إبتداءً من حياتنا على هالأرض، آمين.

البيت الخامس: طوبى لفاعلي السلام، فإنّهم أبناء الله يدعون
من طبيعة إبن الله إنّو ينشر السلام... مار بولس بيطلب منّا أولاً نتصالح مع الله لأنّو وحدو الإنسان المتصالح مع ربّو ومع ذاتو بيقدر يكون صانع سلام بالعالم.
يا ربّ، العالم بأمسّ الحاجة لسلامك وخاصةً الشرق الأوسط بهالأيام. وحّدنا يا ربّ فيك، ملّينا من سلامك حتى نكون فاعلين وناشري سلام بعيالنا ومجتمعنا ووطنّا وبالعالم كلّو، آمين.
اعطي كلّ واحد منّا، نحنا ولاد عيلة مار شربل، إنّو نعيش حسب تعليمك لتلاميذك بعظة الجبل لأنّو فيا وحدا غنى وعظمة الحياة يلّلي بتريدنا نعيشا، آمين.