مقدمة
المجدلله، عيلتنا عيلة مار شربل بترحّب بكل الحاضرين معنا الليلة خاصّةً يللي عمبشاركونا لأوّل مرّة.
بزمن الصوم المبارك. بيدعينا الليلى القديس بولس نسير سيرة جديرة بالبشارة. وبإنجيل القديس متى بيدعينا الربّ يسوع نكون ملح الارض ونور العالم.
يا ربّ إنتَ هوّي النور الحقّ منطلب منّك تعكس نورك علينا تبدورنا نعكس نورك للناس.
الآباء بكراسي الاعتراف تنتجدّد بسر التوبة.
سلة النوايا على درج المذبح.
قداس مبارك للجميع

نية الوطن والعالم
يا إله الرحمة، منصليلك الليلة بقلب واحد، بهالزمن الصعب على كنيستنا ووطننا والإنسانيّة كلها، العالم يا ربّ عم تحكموا أشخاص ما فهموا حبّك ولا عرفوك، ملّوا العالم فساد وعنف، شوّهوا بأعمالهم جمال خليقتك وجمال الحياة اللي منحتها بنعمتك. رجّع يا ربّ الإنسانيّة لكل حكّام هالعالم ليختبروا حبّك ورحمتك ويعيشوا لخدمة الآخر، اهديهم بنورك المقدّس. ومنرفعلك وطننا اللي عم يتجرّح بسكاكين الحقد واللامبالاة والمصالح الشخصيّة. بارك وطنّا يا ربّ وامنحه السلام واعطيه قيامة جديدة. بشفاعة مار شربل منسألك يا ربّ.

نية الإنجيل
"يا جاهل في هذه الليلة تُطلب منكَ نفسُكَ"
يا ربّ إنتَ ضمانتنا الوحيدة، علّمنا نسعى لنعيش كلمتك اللي بتحيي، ونعيش باستعداد للقاءك، ما تسمح نغرق بالعالم وننساك، نعبد العطيّة ويغيب عنّا العاطي، ساعدنا ما ندّخر إلّا محبّة ومصالحة ووداعة لنوقف إدّامك بدون ما نخجل منّك ولا تخجل فينا نوقف قدّامك مليانين منّك. بشفاعة إمنا مريم منسألك يا ربّ.

نية العيلة والمكرسين
منصليلك يا بينا السّماوي من أجل كل يلّي اخترتن ولبّوا دعوتك، من كهنة رهبان وراهبات ومُكرّسين وخاصةً الرهبنة اللبنانيّة المارونيّة ثبّتهم يا ربّ بدعوتهم، تيكونوا ملح لكل ضال، ونور رجا وشهود حتى الشهادة بمسيرتهم على مثال قدّيسينا.
ومنصلي على نيّة عيلتنا عيلة مار شربل ملّي أبنائها يا ربّ من حكمتك والمُس فكرها وقلبها بنعمك تاتكون عم تعبّي زيتاتها من روحك القدّوس لتنوّر بظلمة هالعالم بمسيرة روحانية إنطاكيّة. بشفاعة بيّ عيلتنا مار شربل وإمنا مريم منسألك يا ربّ.

سلة النوايا
العامة
ابتدا صومنا بعرس أرضي حوّل فيه الربّ المي لخمر وببتوّج هالصوم بعرس سماوي، بفرحة القيامة والحياة الأبديّة. مسيرة شفاءات وتحوّل من العدم والموت لمشوار صوب السماء.
مع الأبرص والنازفة منصلي اليوم يا بينا السّماوي على نيّة الجماعة الحاضرة، فيض علين مواهب روحك القدّوس وشفينا من برص الخطية والنزف الروحي.
ومع الابن الضال منرفع صلاتنا على نيّة الشبيبة اللي ضلّت الطريق رجّعن يا ربّ لبيتك الأبوي وثبّتن على صخرة الإيمان.
مع مخلّع كفرناحوم منصلي على نيّة العيل يلي خلعتها الخطيّة وفقدت معنى الحبّ والتضحية، جمعن يا ربّ رجّعلن نقاوة القلب، حتّى تبقى صورة العيلة أيقونة طاهرة ومقدّسة. ومتل ما فرّحت المدعووين يا ربّ بعرس قانا الجليل. فرّح بنعمتك كلّ القادمين على ارتباط بسرّ الزواج المقدّس. عطيُن من فيض حبّك وملّي خوابي حبّن.
ولأنّك قلت "دعوا الأطفال يأتون إليّ" منطلب منّك يا ربّ بهالزمن المبارك تعطي لكل محروم من نعمة الإنجاب، مولود يسبّح إسمك وينادي هوشعنا.
ومع أعمى أريحا منقدّم سلّتنا وكل الأسماء اللي انجمعت والنوايا اللي انذكرت، اعطينا يا ربّ نعمة البصيرة والإصغاء لكلمتك، حتّى نمشي عدرب القداسة ونصير بنعمتك ملح الأرض ونور العالم. بشفاعة العذراء مريم ومار شربل منك يا رب منطلب.

المرضى
الخرس يتكلمون، والمقعدين يُشفون والعرج يمشون، والعميان يبصرون. نعم يا ربّ "إن شئتَ فأنت قادر" منقدّملك الليلة مرضانا الحاضرين والغايبين كل الحاملين أمراض مزمنة ومستعصية اعطين يا ربّ نعمة الشفاء الروحي والجسدي وكمّل مشيئتك بحياتن
مناخذ لحظات صمت ومنذكر أسماء مرضانا...
اشفين يا ربّ بشفاعة العذراء مريم ومار شربل منك يا ربّ منطلب.

الموتى
يا ربّ إنت اللي أحييت بنت يائيروس وأليعازر بعد الموت. اعطي لكل الغابوا عنّا بالحضور نعمة الحياة الأبديّة اغفرلن ذنوبن وخطاياهن واجعلهن حول المايدة السّماوية بفرحة القيامة مع الملايكة والقديسين. مناخد لحظات صمت منذكر أسماء موتانا....

شـــــكران
كل الشكر إلك يا بينا السّماوي، لأنّك رغم ضعفنا، حبّك إلنا ما بيتزعزع. ولأنّك بيّ حنون ما قبلت إنّو نموت بخطيّتنا، أرسلتلنا إبنك يسوع، عطانا ملء الحياة، وكشفلنا وجّك، وكان قدوة لإلنا، حتى نسلك بطريق الملكوت.
الشكر إلك يا يسوع، إنتَ لي جيت نور ينوّر عتمات قلوبنا، كشفتلنا بذاتك، أسرار الحبّ والخلاص، حبّيتنا، وتخلّيت عن عرشك، وصرت إنسان، حتى نصير من أهل السّما. حبّيتنا، وخلّصتنا بموتك على الصليب. حبّيتنا، وبقيت معنا بسرّ القربان، منشكرك.
الشكر إلك يا روح الله القدّوس، روح المحبّة لي عم تدفّق من قلب الآب والإبن، إنت اللي بتقدّسنا، وبتعلّمنا كيف نزرع بالروح، حتى نحصد حياة أبديّة منشكرك.
منوعدك أيّها الثالوث، إنّو نعيش الصوم بفرح، نلتزم بكلمة الله ونعيشا، ونتكرّس للعمل من أجل الملكوت بحياتنا ومجتمعنا. إلك كل المجد من هلّق وللأبد، آمين.

المسبحة الإبن الضال
مسبحتنا الليلة منتأمّل فيها حول الإبن الضال ومنصلي بشفاعة إمنا مريم.

البيت الأول
يا أبي أعطني حصّتي من الميراث فقسّم لهما ثروته وجمع الإبن الأصغر كل شيء له وسافر إلى بلدٍ بعيد.
الإبن الصغير قرّر يفلّ لينبّش عالحريّة فتغرّب عن بيّو بهاك البلاد البعيدة. راح والتهى بالعطايا اللي عطاه إيّاها بيّو، فتّش عن ملذّاته ورغباتو وشهواتو وما عاد فكّر إلّا بحالو، مفكّر إنّو هيك بكون حرّ وما في حدا فوق راسه يقلّو شو بدّه يعمل ولكن اللي ما واعالو إنّو ما بقى في فوق راسه بيّ يعطيه الحياة وقبع حالو عن مصدر الحياة.
ونحنا يا ربّ بأي غربة عايشين بأي غيبوبة عايشين، أدّيش قادرين نقيّم حالنا وأدّيش قادرين نغيّب بينا بس نسينا إنّو بينا ما بغيب ولو نحنا غبنا. منوقف الليلة يا ربّ وقفة لنفكّر بعطاياك الكتيرة لإلنا ونحنا عند أيّ تغرّب صرنا ووينو جوعنا الحقيقي؟
منصلّي هالبيت الأول مع كل إمّ تغرّبوا ولادها عنها لسبب أو لآخر  تحتى ترجع فرحة اللقاء عقلب كل إم حزين.

البيت الثاني
سأقوم وأمضي إلى أبي وأقول له:" يا أبي قد خطأتُ إلى السّماء وإليك ولا أستحق بعد أن أدعى لك إبناً".
هالولد اللي ضيّع كل عطايا بيّو اطلّع بذاتو وما شاف إلّا الجوع والعطش والغربة بلا بيّ والعري متل آدم العتيق، والحبس اللي بأشّط الحريّة لاقى ذاتو راعي خنازير بحقلة إنسان غريب.
بعمق جوعه بعمق موته تذكّر بيت بيّو قرّر يرجع ليكون أجير لأنّو ما بقى بيستحق يكون إبن بس اللي ما كان بيعرفوا إنّو البيّ مش قادر يبطّل يكون بيّ مش قادر يخون الأبوّة.
نعم يا ربّ ياما مرّات تمرّدنا وفكّرنا بينا سيّد وفكّرنا حالنا عبيد، ساعدنا نوعى أديشها نعمة كبيرة إنّو نقرّر نرجع رغم التردّداللي فينا رغم الخوف وشعورنا إنّو نحنا ما منستحق لأنّو ما في حياة خارج حبّك.
منصلي هالبيت التاني من المسبحة مع كلّ إنسان خاطي ليقدر بنعمتك يا ربّ ياخد قرار يرجع لحضنك الأبوي.

البيت الثالث
فيما لا يزال بعيداً رآه أبوه وأسرع وألقى بنفسه على عنقه وقبّله.
البيّ واقف وناطر، وحده، ولا مرّة وقّف الإنتظار كل فكره عند إبنه ولمّا شاف إبنه عن بعيد ما قدر إلّا ما يركض صوبه ويغمره قبل ما يسمع منه أيّ كلمة أو إعتذار، هالبيّ ما قال ولا كلمة لإبنو لأنّو بهالصمت قال كل الحبّ. نعم يا ربّ رغم كلّ الوجع اللي منوجعك اياه بقساوة قلوبنا أو غلاظة عقولنا لمّا منرجع لعندك ما بتقلنا وبتذكّرنا بإننا نحنا ولادك أبناء محبوبين من قلبك. فنيّالنا بهالبيّ اللي عم يلبّسنا حلّة البنوّة وينزع عنّا آثار الخطيّة ويرجّعلنا كرامة الأبناء.
منصلّي هالبيت من المسبحة على نيّة كل عيلة لتعرف تحضن أبناءها بدفء محبتك يا ربّ وحضورك فيها.

البيت الرابع
ها أنا أخدمك كل هذه السنين ولكنّك لم تعطيني ولو جدياً واحداً ولكن لمّا عاد إبنك هذا ذبحت له العجل المسمّن.
خبريّة الفرح برجوع الإبن أغضبت الإبن الكبير ورفض يفوت عالبيت بس البيّ طلع من البيت تيلتقي بإبنه الضايع الغريب الكبير متل ما طلع من البيت تيتلاقى بإبنه الضايع الصغير، طلع يترجّاه إنّو يشارك بالفرحة. هالإبن الكبير اللي ما خالف وصيّة لبيّو كان عم بعيش متل الخادم اللي ناطر معاش بآخر الشهر. ضلّ هوّي بالبيت، عايش متل الغريب وسكّر قلبه عحبّ خيّو.
يا ربّ يسوع، يا أيّها الإبن الوحيد اللي جيت من بيت الآب عبيوت البشر عغربة النّاس، خدنا لعمق قلبك وحوّلنا شهود لحنانك ورحمتك.
منصلّي هالبيت الرابع على نيّة كل إنسان رافض خيّه الإنسان وحاكم عليه المس قلبه يا ربّ ليصير يشبه قلبك الكبير.

البيت الخامس
يا ولدي إنتَ معي في كلّ حين وكلّ ما هو لي هو لك ولكن يجب أن نفرح لأنّ أخاك هذا كان ميتاً فعاش وضالّاً فوجد.
بيّو مصرّ يقلّوا خيّك وما بدّه يخسره، وما عم يفهم إنّو هالسيّد اللي عنده سلطة هو بيّ بحبّ وما عم يفهم إنّو الحريّة هي إنّك تدخل بمشروع هالبيّ وإنّو كلّ المشاريع الدني إذا انفصلت عن مشروع البيّ بتودّي لعند الخنازير وإنّو أدّ ما تكون ممرمغ بالوحل إذا رجعت للبيّ بتلبس لبس الملك.
تنيناتهم جرحوا قلب البيّ والبيّ حبهم تنيناتهم.
يا ربّ كل واحد منّا بيشبه هالولدين، أوقات كتير منتركك ومنبدّد نعمك وأوقات كتير منكون بقلب بيتك وقلوبنا مسكّرة على محبّة إخوتنا اعطينا ربّي نفهم عظمة حبّك لكلّ واحد منّا بمفرده.
منصلّي هالبيت الأخير من المسبحة على نيّة كلّ واحد منّا الليلة، حوّل يا ربّ قلوبنا لقلوب بتحبّ بترحم لقلوب بتشبه قلبك، آمين.