المقدمة

المجد لّله، وكانوا يواظبون على تعليم الرسل والمشاركة وكسر الخبز والصلوات. هيك كانت الجماعة المسيحية الأولى، وهيك نحنا بعيلة مار شربل منلتقي كلّ جمعة من عشيّة بهالدير حتى نتشارك بالصلا والكلمة والقربانة.

باسم عيلة مار شربل منرحب بجميع الحاضرين معنا الّليلة وخاصةً يلّلي عم بيشارك معنا لأول مرّة ومنقول متل ما حضوركن هون بيفرّح قلب يسوع ومار شربل، كمان بيفرّحلنا قلوبنا.

نحنا بالأسبوع التالت من زمن الصوم الكبير المعروف بأسبوع المنزوفة لّلي قرّرت تقرّب من يسوع بالرّغم من كلّ الصعوبات حتى تلمس ولنّو طرف رداءو، لأنها كانت واثقة ومؤمنة إنّو يسوع وحدو لّلي قادر يشفيها،  ومين منّا ما عندو جرح نازف بداخلو؟

بهالذبيحة الإلهيّة رح نوضع حالنا بين إيديك يا رب حتى تشفيلنا كلّ جروحاتنا وتوقّف كلّ نزف فينا، حتى نقدر نكفّي المسيرة معك من جديد. السلّة عَ درج المذبح تانوضع فيها نوايانا،  والكهنة بكراسي الإعتراف تايسمعوا توبتنا ولتجديد مفاعيل معموديتنا. قدّاس مبارك ومقبول للجميع.

نية الوطن والعالم
يا رب وطننا لبنان والعالم عم يتعرّضوا لأمراض التعصّب والإنغلاق وقساوة القلب بعالم كلّو عم يتّجه نحو العلمنة، محبة وعبادة الخلق وإهمال الخالق.
منصلّي يا رب بزمن الصوم المبارك تَنورك يشرق بهالظلمة وتدخل محبتك بضماير الناس ويفهم الكل سرّ آلامك وموتك عالصليب لأجل خلاص كلّ إنسان. بشفاعة مار شربل منسألك يا رب

نية الإنجيل
ما تسمح يا رب بحياتنا الزمنية وقبل ساعة موتنا وبسبب جهلنا ما نلتقي فيك ونكتشف حضورك الغني والحيّ فينا وبكلّ مخلوقاتك. اجعلنا نتمتع بكلمتك وحكمتك الّلي هنّي غذا لنفوسنا،  نعيش بحسب كلمتك ونزرع الفرح والسلام بالمطارح لي زرعتنا فيها. بشفاعة مار شربل منسألك يا رب!

نية العيلة والمكرسين
منصلّي يا رب عَ نية كلّ المكرّسين والمكرّسات بحقلك تيكونوا فَعَلة أُمناء بنعمة روحك القدّوس ومَتَل صالح لكل يلّي بيلتقى فِيُن، منخصّ بالذكر الرهبنة اللبنانية المارونية، إعطِيا يا رب إنّو نكون قدوة صالحة لطريق القداسة.
ومنرفعلك يا رب عيلتنا، عيلة مار شربل تتكون على مِثال عيلة الناصرة مجبولة بالمحبّة وتشهد ليسوع بِعيْشا كلمة الله بالإنجيل. بشفاعة إمنا الحنونة مريم وبيّ عيلتنا مار شربل منسألك يا رب

سلّة النوايا
عامة
يا رب بزمن الصوم زمن التجدّد الروحي منصلّيلك حتى تكون مسيرتنا، مسيرة تخلّي عن أنانيتنا وتعلّقنا بالأرضيّات، ويكون همّنا نكنُز كنوز للسما، ونوعى إنّو خيرات هالأرض رح تبقى بهالأرض وأعمالنا الصالحة هي اللي رح تنتقِل معنا للسما.
منصلّي يا رب حتى تجدّد بحضورك كلّ عيلة جفّت فيها خمرة الحب، رجّع السلام لقلب كلّ العيل المتخاصمة.
منصلّي حتى حبّك يملّي قلب كلّ شاب وصبيّة عم يتحضّروا لسرّ الزواج المقدّس وتكون إنت المحور الأساسي ببناء بيتهُن.
استجيب يا رب لصلاة كلّ عيلة عم تِلتِجي لحنانك الأبوي وناطرة تكتمل فرحتها بنعمة طفل.
كلّ هالنوايا اللي ذكرناها واللي عم تنذكر بقلوبنا ومع اللي طلبوا صلاتنا من لبنان وبرّات لبنان منوضعهم عمذبحك يا ربّ طالبين منّك تعطينا نعمة التواضع تَنِعتِرف بنزفنا، ونتوب عن خطيّتنا.
ومنصلّي على نية توبة كلّ اللي عم يخطّطوا للشرّ حطّ المحبّة بقلوبهم، جدّد إيمانن حتى يتحوّلوا لسُعاة سلام ومحبّة.
بشفاعة إمنا مريم وبيّ عيلتنا مار شربل منسألك يا ربّ.

مرضى
ثقي يا ابنتي إيمانك قد شفاكِ،
يا رب إنت اللي من لمسة رداءك شِفْيِت المرأة النازفة لأنها آمنت بقدرتك، المس بحنانك كلّ مرضانا مرضى النفس والجسد، بلسم جراحن عطِيُن نعمة الإيمان تيُوثقوا فيك إنت الطبيب السّماوي اللي وحدك قادر تشفي نفوسهُن وأجسادُن.
مناخد لحظة صمت منصلّي من أجل مرضانا وبالأخص الأطفال منهُن.
إشفي يا رب مرضانا،
بشفاعة إمنا مريم وبيّ عيلتنا مار شربل منسألك يا رب.

موتى
طوبى للموتى الذين يموتون في رضا الربّ،
منصلّي يا رب على نيّة أحباءنا اللي انتقلوا من هالعالم ورقدوا على رجا القيامة حتى ينالوا الوعد بالحياة الأبدية ويكونوا معك عم يختبروا فرح السما.
مناخد لحظة صمت منذكر أسماء موتانا وبالأخص اللي عم يستشهدوا من أجل مسيحيّتهُن. عامِلهُن يا رب بحسب رحمتك واغفرلُن خطاياهُن.
بشفاعة إمنا مريم وبيّ عيلتنا مار شربل منسألك يا ربّ.

الشـــــكران
بهالمسا المبارك وختام الذبيحة الإلهية ما فينا يا بينا السّماوي إلّا ما نشكرك لانّك دايماً ناطرنا. فاتح إيديك حتى تضمنا لقلبك الطاهر وتغفرلنا آثامنا وتسامح ضلالنا عنّك.
يا ربنا يسوع المسيح لأنّك إنت الطريق الّلي بيوصّل الآب منشكرك، منشكرك على حبّك العظيم الّلي وصّلك للألم والصليب من أجلنا، منشكرك أيّها الروح القدس لأنّك دايماً بتذكّرنا وبتنبّهنا إنّو بوقت الضلال والخطيّة ما إلنا إلّا التوبة الّلي بتجدّدنا وبتحرّرنا.
منوعدك أيّها الثالوث الأقدس نحنا الّلي اخترنا نمشي عدرب القداسة نضل ثابتين فيك ومعك وإيماننا يتجسّد بعلاقتنا مع إخوتنا، وتضلّك إنت وحدك الأول بسلّم أولوياتنا إلك المجد هلّق وللأبد. آمين

مسبــــــــحة
المجد لله، بمسبحتنا اليوم رح نعمل جولة مع يسوع عبر آحاد الصوم. نتأمل بآلامو وموتو الّلي وصّلو للقيامة، كرمال نفهم ونعيش بدورنا موت عن كلّ شي بيبعّدنا عنّو ونوصل معو للقيامة للحياة الجديدة.

1 - بالمحطّة الأولى منتأمل مع كنيستنا بشفاء الأبرص.
الأبرص كان منبوذ منفي خارج الجماعة ومتروك لوجعو وعم يتفكّك جسمو... بلقاؤو فيك يا يسوع مش بس شفيتو وردّيتو للجماعة، ولكن أخدت مطرحو: نبذوك ع الجلجلة وتركوك يتفكّك جسمك كرمال ما تترك ولا موجوع ومهمول إلاّ وتتطالو رحمتك، انهانت كرامتك تتعيد كرامة الإنسان وقيمتو لأصلا...
منصليلك البيت الأول من مسبحتنا يا رب حتى بحق آلام تفكّك جسمك ع الصليب نعيد اللُّحمة لكلّ عيلة ومجتمع عم تفكّكو الخطيّة، ونعيد الوحدة للبشرية الضايعة والشّاردة عن محبتك ومحبة الآب. آمين

2 - بالمحطّة التانية منتأمل مع كنيستنا بشفاء المنزوفة،
هالمرأة الّلي فقدت كلّ أمل بالحياة وعم يصفّي دمّا بانتظار موتا. هي كمان ما قْبِلْت يا رب إلاّ تاخد مطرحا وتنزف لآخر نقطة من دمّك تَ ما يضلّ فينا حدا فاقد للرجا بالحياة الحقيقية. بالقوّة الّلي خرجِت منّك تَ تطهّر المنزوفة قوّينا يا رب تَ نخرج من الجرّة المحبوسين فيا ونلتقى فيك بالموجوع والمتروك، نحبّ كلّ الناس بمحبتك ونكتبا بحبر الدم متل ما كتبتا لآخر قطرة محبّة عَ الصليب.
منسجدلك ومنصلّيلك بالبيت التاني عَ نيّة كلّ المسيحييّن بالعالم خاصةً بالشرق، تَ تحط بشهادتنا إلك أمانة وقداسة عَ مثال الكنيسة الأولى، تيكون الإضطهاد عم يزهّر عنصرة جديدة وشهادة لمحبتك بقلب العالم. آمين

3 - بالمحطة التالتة منتأمل مع كنيستنا بمثل الإبن الضال
هلإبن الّلي بيمثّل كل ّواحد منّا بعَّدتو الخطيّة عن بيت الآب - عن الحياة - وصار مصيرو أدنى من الخنازير... إنت  كمان يا رب تركت مجد الآب بالسما تَ تلحق هالإبن وتاخد مطرحو ويصير مصيرك بين اللصوص وتحمل عقاب المجرمين تَ تردّ الأبناء لكرامة ومجد بَيُّن، تفرِّح السما بعودتن متل لصّ اليمين بعرس عَالصليب ووليمة إنت فيها الحمل المذبوح.
منسجدلك ومنصليلك البيت التالت يا رب عَ نيّة كلّ الكهنة. باركن يا رب وقدّس دعوتن تَ يبقو الرعاة الصالحين الّلي عم بيردُّو الخراف لحظيرتك ويقبلو توبة وعودة الأبناء ويقودو القطيع للبيت الأبوي. آمين

4 -  بالمحطة الرابعة منتأمل مع كنيستنا بالمخلّع
هيدي حالة كلّ خاطي كبّلتو الخطية تَ تنتهي فيه عَ فراش الموت. وإنت يا يسوع أخدت مطرح المخلّع وتقيّدت بقيود السجن تَ تفكفك قيودنا وتسمّرت عَ صليب خطيّتنا تَ تغفرا... لأنّو حال الإنسان الخاطي أخطر بكتير من حيالله مرض بالجسد... والأهم رحمتك ومحبتك أكبر من كلّ خطايانا.
وعّينا عَ خطيّتنا وعلّمنا كيف بدل ما نلمّع قيودنا نكسّرا، بدل ما ندين الآخر نحملو لعندك لأنّك إنت الوحيد القادر تحرّرنا كلنا من عبوديّة الخطيّة.
منصلّيلك البيت الرابع من مسبحتنا عَ نية الجماعات الروحيّة بالكنيسة تَ تعرف تكون علامة محبتك وحضورك بقلب العالم، وتشهد لمحبتك لكل خاطي وتجيبو لعندك تَ يدوق طعم الحريّة من الخطية. آمين

5 - بالمحطة الخامسة منتأمل مع كنيستنا بالأعمى
الأعمى الّلي بكلمتو ما قدر يسكّت الجمع  ووصّلِتو لعندك. ومنتأمل كيف أخَدِت مطرحو واحتقرك ورذلك الناس، وتآمرو عليك تَ يسكتوك إنت كلمة الحياة...
ولكن يا رب، الحياة أقوى من الموت والحب أقوى من الخطيّة. علّمنا كيف معك نتحدّى الصِعَاب وما نقبل نترك شي بيرجّعنا لَورَا أو حتى بيوقّف مسيرنا صوبك. فتّح عيونّا عليك تَ نتبعك بالطريق بشجاعة ولو الطريق واصلة عَ الجلجلة، نحنا رجانا بعد هونيك،  رجانا نموت معك تَ نحيا معك إنت الطربق والحقّ والحياة.
منسجدلك ومنصلّيلك يا رب البيت الأخير من المسبحة عَ نيّة أبناء عيلة مار شربل خلّي كلمتك فينا تصرخ أعلى من ضجيج العالم، علّمنا نشدّد بعضنا وندعي الكلّ لعندك. من هالصوم المبارك نمشي سوا طريقك، طريق التخلّي والعبور للحياة الجديدة معك حتى يتمجّد إسمك فينا. آمين