المقدمــــــــــــة
"إنّكم في قلوبنا، لنموت معاً ونحيا معاً."
عيلة مار شربل بترحّب بكل الحاضرين معنا وخاصة ليللي عم يشاركونا لأوّل مرّة.
"نعم يا ربّ منطلب منّك ما تتركنا نِبعُد عنّك لأنو من دونك منموت، امسكنا وشدنا لعندك لنحيا."
لكل يللي بيحبّوا يعيشوا نعمة المصالحة الآباء ناطرينّا بكراسي الإعتراف ولكل شخص بحبّ تشاركوا نواياه سلة النوايا على درج المذبح. قداس مقبول للجميع.

نية الوطن والعالم
منصلي على نية المسؤولين بوطنّا ولكل العالم لتكون مسؤوليّتن خدمة وعطاء. يرحموا شعبن ويحافظوا على كرامتو يسندوا الضعيف والمحتاج لتعيش الإنسانيّة وتموت الأنانيّة.
بشفاعة إمنا مريم وبي عيلتنا مار شربل منسألك يا ربّ

نية الإنجيل
"إنّ الحرف يقتل أمّا الروح فيحيي"
منصلي يا ربّ على نيّة مشروع حياتنا، قداستنا. ساعدنا لنتحرّر من ضعفنا وإهمالنا وما نتعلّق بكنوز هالدني الفانية. نسعى للكنز الأبدي يلّي هوّي إنتَ.
بشفاعة إمنا مريم وبي عيلتنا مار شربل منسألك يا ربّ

نية العيلة والمكرسين
منرفعلك يا رب كل مكرّس ومدعو وبالأخصّ كل الكهنة والرهبان والراهبات وبالأخصّ الرهبنة اللبنانيّة المارونيّة لتبقى الشاهدة الأمينة ليسوع المسيح.
ومنرفعلك يا رب عيلتنا عيلة مار شربل زيدنا إيمان لنكون بالخدمة والعمل رهبان حقيقيّين بقلب العالم من خلال الخدمة والعمل والمحبّة والصلاة.
بشفاعة مار شربل منّك يا ربّ منطلب

سلة النوايا
عامة
يا رب بعد تعب الأسبوع منجي لعندك تنوضع همومنا ونوايانا عمذبحك واثقين إنّك إنت ناطرنا، عطينا نفهم إنّو لقاءنا فيك كل ليلة جمعة هو مسيرة تحوّل بحياتنا تنروح صوبك إنتَ المسيح، النور الحقيقي اللي إجا عالمنا من أجل عالمنا من أجل خلاصنا.
إستجيب يا ربّ بمحبتك طلباتنا وخلّي نورك يشعّ بقلب عيالنا اللي عم تمرق بظروف صعبة ساعدهم تيرفضوا كل خصام ويسعوا للوحدة والحب، خلي نورك يضوّي على قرار كل تنين عم يأسّسوا عيلة حتى يكونوا واحد بالحب متل ما إنتَ والآب واحد.
منسلمك يا ربّ كل عيلة ناطرة نعمة طفل تيكونوا شركاءك بالخلق.
كل النوايا اللي ذكرناها والنوايا اللي انجمعت بسلّتنا وعم تنذكر بقلوبنا منوضعهن بين ايديك طالبين منّك تجدّدنا بنورك، تنكون أداة طيّعة لمشروعك نتبع تعاليمك.
بشفاعة إمنا مريم وبي عيلتنا مار شربل منّك يا نبع المحبّة منطلب.

مرضى
استجيب يا ربّ بحنانك طلباتنا من أجل كلّ مريض ومتألّم بالنفس أو بالجسد عطيهُن نعمة الصبر عالألم والرجا بالشفاء والإيمان بإنّك بتحبهن وحاضر معهُن.
مناخد لحظات صمت منذكر أسماء مرضانا وخاصةً مرضى السرطان
يا ربّ إن شئت اشفي مرضانا
بشفاعة إمنا مريم وبي عيلتنا مار شربل منك يا نبع الحنان منطلب

موتى
استجيب يا ربّ برحمتك طلباتنا من أجل كل يللي انتقلوا من هالحياة من أهل وأحبّاء ليتمتّعوا بوجهك، استقبلهم بملكوتك وحقّق فيهُن وعدك بالميراث الأبدي.
مناخد لحظات صمت منذكر فيها موتانا والنفوس المنقطعة والمطهريّة اغفرلنا واغفرلهُن الخطايا والزلّات.

الشكران
بيد الحبّ يا ربّ جبلتنا ومن تراب هالكون كوّنتنا وبنفخة من روحك اعطيتنا الحياة، فيا خالق الكون منشكرك. إنت اللي نحتت ملامح كياننا على صورة حُبّك وقداستك ورجعتلنا كرامة الأبناء وجعلتنا ورثة بملكوتك.
يا يسوع المسيح يا حمل الله وكلمة الآب إنت اللي دخلت ععمق اعماقنا مع هالقربانة لتشفي غضبنا وخوفنا وكبريائنا بقوّة جسدك ودمّك منشكرك.
منشكرك يا روح الله القدّوس إنت وحدك قادر تملّي فراغ قلوبنا إنتَ قدرة الله الخفيّة بكل واحد منّا، لترسم وجه الله فينا وبتعمل من البشريّة عيلة واحدة بتشبه عيلة السما لتقدر تصرّخ للآب:" أبّا أيّها الآب".
منوعدك أيّها الثالوث نكون جبلة محبّة بهالعالم بزمن انطعن الحبّ وانفقد السلام، بزمن حطينا فيه الله عجنب وملكنا نحنا، بهالزمن... بدنا نكون قناديل مضويّة ورسل لحبّك نبشّر بخلاصك لأبد الآبدين، آمين.

المسبحة
منتأمل سوا ببعض أيات أناجيل أسبوع الدنح

1 -التأمل: "ها أنا مرسلٌ ملاكي أمام وجهك ليُمهِّد الطريقَ أمامكَ".
يوحنا يللي عم بيمهّد الطريق، سمع بقدوم الآتي يللي هو مرسل قدّامه ليعدّله طريقه، سمع فيه وأراد يتأكد. فأرسل يسأل : انت هو ام مننظر بعد؟. الرب بيجاوب على تساؤلات يوحنا: أنا هو.
يا ربّ الخلاص أعطيته مجاناً لكل واحد منّا، لكل مين عم يعرف يصغر ويقبل. تعا يا روح الله الساكن فينا، نقّينا طهّرنا، نعمة التواضع اعطينا لتتحوَّل قلوبنا ونعيش بشكر دايم لنعمة الله علينا وتهليل وفرح بكل وقت للخلاص يللي أعطيَ إلنا.
منصلّي مع امنا العدرا هالبيت الأول من المسبحة على نيّة كل واحد منا

2 - التأمل: "أنا المُحتاج أن أعتمِدَ منكَ، وأنتَ تأتي إليَّ"؟.
وإجا يسوع لعند يوحنا،  طوبى ليوحنا لأنه شاف الإله، وما صدّق ان هذا الإله الذي خلق كل شيء، الذي انتظرته الشعوب ليخلّصها، الذي تكلّم عنه الأنبياء، الذي سبقه ليعد طريقه، الذي هو الله ومن الله أتى، ما صدّق يوحنا انه بدّو يعتمد على يده... عرفه، سجدله، اندهش لحضوره وعمل ما أمره به. فتمّ الظهور الإلهي، ظهور الروح، صوت الآب، واعتلان الإبن. وانفتحت علينا السماء.
يا ربّ، تمّمت كل شيء، لتصالحنا مع الله الآب أبانا
نشكرك أيها الربّ يسوع على خلاصك، نشكرك على عظمة محبتك، قوّينا لنعمل بحسب كلمتك.
منصلّي هالبيت من المسبحة على نيّة كل كل مرضانا

3 - التأمل: "هو يعمِّدك بالروح القدس والنّار".
جايي الذي هو أقوى منه، جايي يللي رح يعمّد الشعب بالروح القدس والنار ... لكن الشرّ يريد التخلّص من الخير، فألقى يوحنا في السجن. ويسوع الذي وقفَ مع الشعب، نزل وتواضع، قدّس المياه، ليقدّسنا. نزل ليقوللنا أنه رح يموت ويقوم ليعلّمنا كيف نموت معه في المعموديّة عن كل ما يبعدنا عنه، لنقوم معه إلى الحياة
يا ربّ، نحن الذي اعتمدنا، لبسنا روحك وصرنا من أهل بيتك، قوّينا لنسير بهدي الروح، نموت عن الخطيئة والضعف، عن مغريات هذا العالم، ونقوم كل يوم معك متجدّدين للحياة     
منصللي هالبيت على نيّة كل المكرسين

4 - التأمل : "أمّا الآتي بعدي فهو أقوى منّي".
بيغار يوحنا على بيت الله، كغيرة إيليا. بيدعي الناس إلى التوبة، وما بيملّ يُخبر عن الآتي الأقوى، الذي سيعمّد بالروح والنار.
يا ربّ، أعطنا نعمة التوبة اليوميّة أعطنا أن نجتهد بالصلاة والعمل لنكون على حسب قلبك
منصللي هالبيت من المسبحة على نيّة شبيبتنا اهديُن ليستعملوا طاقاتهم لخدمة ملكوتك.

5 - التأمل : "ها هو حملُ الله الذي يرفع خطيئة العالم".
يوحنا عاين وآمن وشهد، "هذا هو حمل الله". انتهى دوره، إجا المخلص فصار عليه أن يصغر ويختفي. شاف عظمة الله وعرف حجمه
وما اهتم إلا بإتمام دعوته في هذا العالم على أكمل وجه.
خلقتنا يا ربّ، دعوتنا كل واحد منّا بمفرده، سلّمت كلّ منّا رسالة، ساعدنا لنعي دعوتنا، وكيوحنا نتممها على أكمل وجه في عالمنا، بيوتنا ومجتمعنا، لنحيا بإستعداد دائم يومي للقياك.
منصللي هالبيت من المسبحة على نيّة المشاركين معنا ملّينا قوّة من روحك وارسلنا نحكي عن حبّك ورحمتك وعدلك وحنانك وخلاصك.