المقدمــــــــــــة :

المجد لله،
"وكانوا يواظبون على تعليم الرسل والمشاركة وكسر الخبز والصلوات"

عيلة مار شربل بترحّب بالجميع وخصوصاً الحاضرين معنا لأول مرّة. متل كل ليلة جمعة منلتقا بهالمكان المقدّس عند القديس شربل تننتلي من محبة الله، نتعمّق بكلمتو ونتناول جسدو تننما ونتحوّل من تراب لنور، ومننطلق بالعالم نشعّ من نور الرّب.

نحنا بأسبوع بشارة زكريا. والأحد القادم، أحد بشارة العدرا. منطلب من الرّب نعمة الطاعة والتواضع تنكون طيّعين لمشيئتو ونتحلّى بتواضع مريم ونقول "نعم" لمشروع الملكوت تنحققوا بحياتنا من هالأرض.

منقدّم هالقدّاس على نيّة السلام بلبنان والشرق، تتكون المحبة هي لغتنا المتداولة الوحيدة للي منستمدّا ومنتعلّما من الصليب. منذكّر إنّو الكهنة ناطرين بكراسي الإعتراف كل واحد منّا تينقّي قلبو وينطلق إنطلاقة جديدة بثبات ومثابرة.

سلّة النوايا على درج المذبح لنوضع كل نوايانا بكل رجا.

قدّاس مبارك للجميع.

نية العالم والوطن:
"وأنا أكون لهم إلهاً وهم يكونون لي شعباً".
يا رب منصلّي على نيّة المسيحيين بلبنان والعالم، عاملنا برحمتك، وجّهنا بالحكمة لتكون أعمالنا عم تطبع هويتنا المسيحيّة، تنتغيّر، تنقبلك إله لإلنا بالقول بالفعل، نقبل تعاليمك، نقبل نكون شعب للإلك، نفكّر، نحكي، ونتصرّف بَنفَس الإنجيل دائماً ووين مكان.
بشفاعة العدرا مريم ومار شربل منسألك يا رب.

نية الإنجيل:
"لكني أعرفه وأحفظ كلمته"
يا رب أعطينا نكون متل إبنك يسوع، ملّينا من التواضع لنحفظ كلمتك والتسليم لنوثق بمشيئتك. يا رب، ساعدنا ليكون عنّا محبّة كافية تخترق الحواجز اللي بتبعدنا عن بعض، أعطينا القوة لنتخلّى عن الأشياء اللي معلقين فيا تنقدر نتّحد فيك.
بشفاعة مار شربل منسألك يا رب.

نيّة المكرّسين وعيلة مار شربل:
منصلّي يا رب، على نيّة المكرّسين والمكرّسات لخدمة مذابحك بالعالم. منخصّ بالذكر الرهبنة اللبنانية المارونية. ثبّت أساساتها وزيدها إيمان تثمر هلّق وبكل وقت قدّيسين وقدّيسات على صورتك وعلى خطى إبنك يسوع يمجدوا إسمك ويضوّوا كالنيرات.
ومنصلّي على نيّة الجماعات الكنسيّة خاصة عيلة مار شربل. باركنا يا رب رجّع قناديلنا نقيّة وشفّافة، نعيش هلّق وبكل وقت فرح تجسّد الكلمة.
بشفاعة العدرا مريم منسألك يا رب.

 السلّة:
"لا تخف يا زكريا فقط استُجيبت طلبتك"
جينا لعندك الليلة يا ربّ، حاملين معنا كل نوايا قلوبنا وجماعتنا ونحنا بثقة الأبناء عارفين إنك رح تستجيب طلباتنا، تزيل أي خوف من قلوبنا وتغمرنا بنعمك.
منسلمك كل عيالنا وخاصة العيَل الي عم تمرق بصعوبات لتجمعها وتزرع فيها محبتك وسلامك.
منسألك ترافق كل شخصين عم يتحضّروا ليأسسوا عيلة جديدة وتستجيب رجاء كل زوجين بعدن ناطرين منّك نعمة طفل.
كما منصلّي من أجل كلّ شخص مارق بضيق وكلّ شخص عايش بغربة لحتى تحفظهم وبنعمتك تنوّر دربهم وتكون السند إلهم.
كل هالنوايا اللي ذكرناها واللي انوضعت بالسلة وهلق عم نذكرها بقلوبنا منوضعها أمام قلبك الوالدي...
بشفاعة العدرا مريم ومار شربل منسألك يا رب.

المرضى:
يا ربّ منقدّملك كل مريض ومتألم بالجسد أو بالنفس، وخاصة أصحاب الأمراض المستعصية. منسألك تساعدهم وسط آلامهم تيختبروا حضورك أكتر وتحطّ بحياتهم أشخاص تخدمهم وتساندهم. مناخد لحظات صمت منذكر فيها أسامي مرضانا ...
امنحهم الرجاء والقوّة والشفاء اللي هنّي بحاجة إلو.
بشفاعة العدرا مريم ومار شربل منسألك يا رب.

الموتى:
"إن حفظ أحد كلمتي فلن يشاهد الموت أبداً"
منوضع يا ربّ أمام رحمتك نفوس أمواتنا وخاصة نفوس ضحايا الحروب وأعمال العنف..  والأنفس المطهرية والمنقطعة.
مناخد لحظات صمت منذكر فيها أسامي أمواتنا ...
حقق رجاؤن باللقاء فيك والحياة الأبدية معك.
بشفاعة العدرا مريم والقديس شربل منسألك يا رب.

الشكران
بهالزمن المبارك زمن البشارات منشكرك يا ربّ على مشروعك الخلاصي إلنا ومنشكرك على زكريا وإليصابات يللي بيعلمونا نعرف ننتظر كلّ شي منك بصبر كبير، ونوثق بأحكامك وكرمك يللي بيفوق توقعاتنا ..

منشكرك يا بينا على مسيرة القداسة اللي اخترتنا انّو نمشيا صوبك؛ مسيرتنا ما بتخلص إلا ما نبلغ قلبك الأبوي اللي خرجنا منو. منشكرك لأنك عم تدوّقْنا طعمة الحياة الحقيقيّة معك بالملكوت نحنا وبعدنا بقلب العالم.

منشكرك يا يسوع لأنّك بكلمتك عم تزرع فينا بذور حياة أبدية إنت القايل: "اللي بيحفظ كلامي ما بيموت"

منشكرك يا روح القدس اللي حوّلت الخبز والخمر لجسد ودم يسوع لأنّك بالفعل ذاتو عم تحوّلنا من تراب لَ نور

قدّرَنا يا رب أنو نشتغل بأمانة بكلّ هالهدايا ونكون مسؤولين عن خلاص نفوسنا وخدامَك لخلاص العالم مِن حولنا حتى يتمجد إسمك القدوس أيها الآب والإبن والروح القدس هلق وللأبد آمين

تأملات المسبحة:

مسبحة بشارة زكريا

إنجيل لوقا: 1/ 1- 25 

1 - لأجل أن كثيرين راموا أن يكتبوا قصص الأحداث التي نحن عارفون بها كما سلمها أولئك الذين كانوا من قبل... رأيت أنا أن أكتب لك كلّ شيء بترتيبه...

القديس لوقا عم ينقل شهادته. هوّ اللي صار شاهد وخادم لهالكلمة. تتلمذ، والتلميذ ما بيضلّ تلميذ يتحول لشاهد ويبشّر بالكلمة ويساهم ببناء ملكوت الله.

يا ربّ افتح قلوبنا لالهامات الروح القدس تنتتلمذ إلك بكلّ جديّة ونسعى لنلتقي فيك. وتكبر رغبتنا لنقل البشارة لكل اللي منلتقي فيهم.

منصللي هالبيت الأوّل من المسبحة على نيّة كلّ الحاملين رسالة بهالعالم. كلّ المرسلين، رهبان، راهبات، كهنة وعلمانيين... الحصاد كثير والفعلة قليلون. فيا ربّ أرسل فعلة لحصادك. آمين.

2- كان في أيّام هيرودس كاهن اسمه زكريا وامرأته اسمها اليصابات وكانا بارّين كلاهما أمام الله وسائرين بجميع وصاياه وببرّ الرّب بدون لوم. ولم يكن لهما ولد.

كانا بارّين ولم يكن لهما ولد.

يعني كانوا عايشين اتنينهم بالرجا. عم يعملوا اللي عليهم بكلّ أمانة ووفق إرادة الله، ووصاياه. كانوا أرض طيّبة وربنا بيفتش على الأرض الطيبة ليحلّ فيها.

يا ربّ، علّمنا كيف نكون أرض طيبة ننطر خيراتك ونِعَمَك برجاء وإيمان ما بيتزعزعوا.

منصلّي هالبيت الثاني من المسبحة على نيّة كلّ عيالنا وخاصة العيل المنتظرة نعمة طفل من قلبك يا ربّ. اعطي هالعيل يا ربّ نعمة الإيمان الكبير بانّك جايي وما بتخذل أبداً مُحبّيك. آمين.

3 - "وفيما كان يكهن  في ترتيب خدمته أمام الله بلغته نوبة وضع البخور فدخل هيكل الرّب وكان كلّ جماعة الشعب يصلّلي خارجاً فتراءى  لزكريا ملاك الرّب واقفاً عن يمين مذبح البخور".

الوقت وقت مقدّس، وقت صلاة وخدمة، مش بس زكريا عم بيصللي، الشعب كلّه عم بيصلّلي. وهالبشارة مش بس لزكريا، هيّ لكلّ الشعب.

يا رب أنت دايمًا بتاخد المبادرة، بتتدَخّل بحياتنا، وانتَ وحدك بتعرف امتين وكيف، لكن انتَ دايمًا بتوفي بوعودك.

قوّينا يا ربّ لنعرف ننطر بصعوبات حياتنا، ونضل مواظبين على الصلاة بدون ملل.

منصللي هالبيت من المسبحة على نيّة كلّ المرضى وكلّ المتألمين. أعطيهم يا ربّ القوّة  ونعمة الرجاء والإيمان الكبير ونعمة الانتظار بأنّه خلاصهم أكيد وانت جايي. آمين.

4 - فقال له الملاك : لا تخف يا زكريا، فانّ صلاتك قد سُمعت

قال زكريا: كيف أعرف هذا أنا شيخ وامرأتي طاعنة في أيامها....

فأجاب الملاك:  أنا هو جبرائيل الواقف أمام الله... فلتكن منذ الآن صامتاً لأنّك لم تؤمن بكلماتي التي تتم في أوانها.

ليش إيمان زكريا خذله. نظر لنفسه ولزوجته العجوز وقال: مش ممكن نحنا صرنا طاعنين بالسن... نسي انه الرّب هوَ إله المستحيل.

فلتصمت! أعطاه الرّب نعمة الصمت مش قصاص بل دعوة للإصغاء والتأمل ليعرف شو بيريد الرّب وعلامة للشعب الناطر. أعطاه "حنان الله".

ونحنا هل إيماننا عم بيخوننا، هل تعودنا على عقمنا وحزننا وكآبتنا وما عم نعرف نفرح...

فلنفرح إلهنا إله المستحيل. فلتؤمن هوِّ رح يحوّل كلّ عقم لخصب وكلّ كآبة لفرح وهوِّ وحده بيعرف الوقت...

منصللي هالبيت الرابع من المسبحة على نيّة كلّ الخطأة وكلّ اللي فقدوا إيمانهم بالرّب. ازرع يا ربّ بالعالم الرجا والفرح بدل الكآبة، والسلام بدل الحرب. آمين.

5  وبعد تلك الأيّام جبلت اليصابات امرأته وكتمت أمرها خمسة أشهر وكانت تقول هذا ما صنع الرّب اليّ في الأيّام التي نظر اليّ فيها لينزع عاري من بين البشر.

مشروع الرّب بدّو يتم وما حدا بيقدر يوقف بوجّو.

مشروع الله أكبر من الإنسان. أحياناً ما منفهم. بس إذا كان عنّا إيمان منقدر نسمع الملاك عم بيقلنا "لا تخافوا صلاتكم قد سمعت". وإذا عنا إيمان منعرف ننطر على قد ما نطرت اليصابات. عاشت بارة وخدمت الرّب بأمانة وضلت متمسكة بالإيمان والرجاء والمحبّة ونالت النعمة من عند الرّب.

قوّي إيماننا يا ربّ، قوّي ثقتنا، نحنا منسلمك ذاتنا اليوم من جديد، علّمنا نصبر، نصلّي، نتأمل، نسكت ونُصغي لنسمع ونفهم إرادتك.

منوقف اليوم وقفة جريئة أمام ذواتنا ونسأل وين إيماننا؟

منصللي هالبيت الخامس من المسبحة على نيّة المشاركين بهالمسبحة، على نية كل العيل لحتى نتعلّم نعيش بإصغاء دايم لكلمتك يا رّب ونكون شركاء بنشر وبناء الملكوت. آمين.