المقدمــــــــــــة :
المجد لله .
منرحّب بكل المشاركين معنا بالقداس الليلة وخاصة اللي جايين لأول مرّة.
نحنا بالأسبوع الثالث من زمن الدنح، بتحتفل الكنيسة هيدا الأحد بعيد دخول المسيح للهيكل، واليوم بصادف عيد القديس بوسكو اللي عاش طفولة صعبة ولمّا ارتسم كاهن اهتم بشؤون الشباب وأسس الرهبنة السالسية. الربّ من ضعفنا بيعمل قوّة.
منذكّر الكهنة حاضرين ليعرّفوا وسلّة النوايا على درج المذبح
قداس مبارك ومقبول من الجميع.

النوايــــــا :
نيّة الوطن والعالم
بزمن الصراعات والنزاعات اللي عم بتعِم الدُول والشعوب وخاصة اللي عم بتعاني الإضطهاد من أجلك يا رب منصلّي ومنوضع الليلة على مذبحك حكّام العالم وخاصة حكّام هالشرق والمسؤولين بوطنا لبنان.
وحّدن يا رب بكلمتك وبقوّة روحك القدّوس حوِّلن ليصيروا يحكوا لغتك، لغة رحمة وعدالة لغة محبة وسلام.
بشفاعة امنا مريم العدرا  وبيّنا مار شربل منسألك يا رب

نيّة الإنجيل
"ما تكلم إنسان يوماً مثل هذا الإنسان"
منصلليلك يا رب عن نيّة كلّ الأشخاص اللي بعدون رافضين كلمتك وعمبعبّوا فراغن بأحمال وأعباء عمتحنيلون كتافون وما عادوا قادرين يشوفوا وجّك وحقيقتك.
اعطينا نعمتك يا رب كلّ يوم كفاف يومنا حتى نعبّي فراغنا من كلمتك، نوعا للحقيقة نتحرر من جنازيرنا حتى بروحك القدوس نعبّي من محبتك ونشهد إنك إله حيّ وحاضر فينا.
بشفاعة العدرا مريم وبيّ عيلتنا مار شربل منسألك يا رب

المكرسين وعيلة مار شربل:
ثبّت يا رب إيمان كل شب وصبية لاقو دعوتن معك حتى يكون وجودن بالمجتمع متل وجود يسوع بيشفي من كل مرض وبينقل الفرح لقلوب العالم، عطي رهبانّا وراهباتنا روحك القدوس لعيش الطاعة والعفة والفقر. منرفعلك الرهبنة اللبنانية المارونية لتبقى منبع قديسين ومنخص بالذكر عيلتنا عيلة مار شربل لنسلك متل بيّ عيلتنا من التراب للنور.
بشفاعة إمنا مريم العدرا وبيّ عيلتنا مار شربل منسألك يا رب

الســـــــلّة :
عامة:
بزمن الروح وبهالوقت المبارك منقدّم على مذبحك يا رب سلّتنا، كلّ الأسامي يللي انذكرت على الورق والأسامي يللي غم تنذكر بالقلوب، طالبين منّك :
يا الله الرّوح، إجمع عيالنا المفككة وثبّت عيلنا المترابطة.
تعا يا الله الرّوح، فرّح كل زوجين بحالة إنتظار بطفل يملي بيتهم وبارك أطفالنا.
تعا يا الله الرّوح، قدّس "نَعَم" كلّ شخصين قرروا يرتبطوا بسرّ الزواج المقدّس.
تعا يا الله الرّوح، فيض بمواهبك على شبيبتنا، قلب الكنيسة النابض، وصوِّب قراراتهم نحو الملكوت.
مع كل النوايا يللي بقيت دفينة بقلوبنا، منطلب منّك يا الله الرّوح تعا حلّ علينا، جدّدنا وحوّلنا بما يليق ببنوّتنا لله الآب.
بشفاعة أمنا العدرا منسألك يا رب

مرضى:
بثقة كبيرة منستودع قلبك يا رب كل مرضانا، مرضى النفس والجسد. إنت بتعرف أوجاع وتضرّعات وطلبات ولادك ... زيدنا يا رب إيمان ورجا فيك إنت الشافي الوحيد.
مناخد لحظات صمت منذكر فيها مرضانا
إشفيهم يا رب إذا أردت
بشفاعة مار شربل منسألك يا رب

موتى:
على حسب رحمتك اللامتناهية وجوهرك الحب الكامل، انظر يا رب لموتانا أغفر خطاياهم
واجمعهم مع قديسيك على مائدتك السماوية.
مناخد لحظات صمت منذكر موتانا
بشفاعة امنا العدرا منسألك يا رب

الشـــــكران
منشكرك أيها الآب السماوي على محبتك اللامتناهية يللي فيها ما إبلت إنو تترك الإنسان عم بيتخبط بضياعه وخطيئته ولكن هيأته لمخططك الخلاصي وبعتلنا إبنك نور تجلّى لكل الأمم.
منشكرك أيها الإبن لانك انت مصدر لكل النعم، انت خبز الحياة علّمتنا كيف نشارك مع إخوتنا لنستحق الطوبى لمّا نوقف قدّامك.
منشكرك يا روح الله القدّوس إنت يللي بتنور عقولنا وقلوبنا، اعطينا إنو نجوع لكلمة الحياة، مللي قلوبنا بمحبتك لحتى تكون إرادتنا مطابقة لإرادتك.
وعدنا إلك أيها الثالوث إنو نجاهد لنتحرر من كل ملذّات هالعالم يللي مكبلتنا ومبعدتنا عنك لننتلي من نعمتك إنت وحدك. إلك المجد من هلق وللأبد آمين.

المسبحة
بمسبحتنا الليلة رح نتأمل بدخول المسيح للهيكل اللي بتعيدو كنيستنا ب2 شباط . هاليوم هو يوم صلاة من أجل كل المكرسين اللي قدموا حياتُن لخدمة كلمة الرب وكنيسته .

باسم الآب والإبن والروح القدس الإله الواحد آمين

البيت الأولى : منتأمل حضور يسوع للهيكل مع يوسف ومريم حتى يقدموه للرب متل ما هو مكتوب بالشريعة
ما أعظمك يا ربّ وما أعجب سرّ الفدا والخلاص، إنت ربّ الهيكل تركت عرشك السماوي ونزلت لعنّا تترفَع بشريتنا الضعيفة، بحلولك بالهيكل عم تخضع لشريعة بشرية، عم تقدّم ذاتك لبيك إنت اللي بتعبدك الخليقة وبتسبحك وبتمجدك مع بيّك السماوي. بحلولك بالهيكل تمّت النبوة وانتهى زمن الإنتظار، قدوس الله صار بوسطنا
منصلي مع مريم الطاهرة النقية على نية كلّ إنسان معمّد وبالأخص نحنا المشاركين بصلاة المسبحة تنوعى لأهمية إنتماءنا للعيلة المقدسة، وما نخاف نقدّم لبينا السماوي قلبنا وحياتنا تيحوّلنا ونكون حضورو الفعالّ بقلب عالمنا.

البيت التاني : منتأمل بتقادم يوسف ومريم زوجي يمام وفرخي حمام يللي هني تقادم تطهير الفقراء
يا ربّ قمة التواضع والفقر كان بتجسدك عأرضنا، ولدت بقلب عيلة فقيرة، افتقرت حتى تغنينا وتعلّمنا أنّو الغنى الحقيقي هوّ وقت اللّي منتخلى ومنفكفك عنا جنازير العالم ونروح للقاءك. يا ربّ تندخل بعلاقة معك بدنا نفتقر عن كبرياءنا وأنانيتنا وعن الضمانات المادية اللي مكبلتنا، بدنا نتخلى عن شهواتنا، وملذات العالم، ونوضعك إنت بأولويات حياتنا، نفتقر عن أنفسنا لنغتني فيك ومنك.
مع يوسف ومريم مثال التواضع والفقر منصلي من أجل كلّ المكرسين والمكرّسات تيكون عندهم الشجاعة يختاروا الفقر بحياتُن، يغتنوا منك ويكونوا بخدمة الإنجيل وإرتداد النفوس الضالة.

البيت التالت : منتأمل بسمعان الشيخ الرجل البار التقي اللي ناطر عزاء إسرائيل
سمعان إنسان بارّ، عايش بحسب تعاليم الكتاب المقدس، حياتو هي صلاة وهوي بحالة إنتظار لمجيء الربّ، هوي رجل إيمان عم ينقاد لهدي الروح القدس اللي  أوحى إلو أنو ما بدوق الموت قبل ما يشوف مسيح الربّ. يا ربّ سمعان اختبر بالجسد اللي نحنا مدعوين نختبروا بحياتنا الروحية، وعدك لسمعان هوّ وعد لكلّ واحد منا أنو ما نموت قبل ما نعاين خلاصك. سمعان الشيخ بعلّمنا أنو اللي منترجاه رح يتحقق، بعلمنا الثقة أنك أمين لوعودك، أنو مشيئتك رح تتحقق فينا ومن خلالنا.
يا رب مسيرتنا غايتها إنت وعارفين أنك ما وعدتنا بحياة سهلة وما قدمتلنا ضمانات، دعيتنا لمغامرة ثقة، للإيمان فيك والرجا بحضورك معنا.
منصلي البيت التالت مع مريم المليانة نِعَمْ على نية عيالنا وبالأخص على نية عيلتنا عيلة مار شربل اللي اختبرنا محبة الله واخترنا نكرس ذواتنا تَنْكون فعلة بحقل الربّ، نقبل إرادتو بحياتنا ونروح للعمق.

البيت الرابع: سمعان حمل بين إيديه يسوع، بارك الله وقال الآن تطلق عبدك بسلام لأنو عيناي شافت الخلاص
لما سمعان حملك بين إيديه أعلن الخلاص اللي كانت ناطرتو الشعوب تحققّ، وعِرِفْ أنّو كل وعودك وإنتظارات الشعوب اختصرها طفل بين إيدين مريم، إنت الخلاص المتجسد اللي صار إنسان حتى نلمسه نشوفو نسمعه ونتناولو. سمعان حِملَك بين إيديه وما عاد بده شي إلا ينطلق لحضن الآب ونحنا عم نحملك بقلوبنا عم تجي وتسكُن فينا بالرغم من ضعفنا وخطيتنا ودايماً بتعطينا فرصة تنرجع نبلش من جديد.
مع مريم إم عيلة الناصرة وأمنا منصلي على نية كل إنسان مغيّب الله من قلبو وحياتو، تيختبروك إنت نور العالم اللي جيت تبدّد ظلام الخطية وتعطينا السلام

البيت الخامس : منتأمل بكلمة سمعان لمريم: وأنتِ أيضاً سيجوز في نفسك سيف فتنجلي خفايا قلوب كثيرة
يا مريم اللي عرفتي أنك رح تتألمي، ما تهربتي من الدعوة وما تراجعتِي، كملتّي المسيرة عالطريق اللي رسمها الرب إلك وقبلتيها، قلتي نعم لمشروعو، رغم سيف الألم صرت خادمة لسرّ التجسد والفدا. علمينا يا مريم نطلب نعمة الإيمان كلّ يوم بحياتنا، نمشي بحسب هدي الروح القدس عالطريق اللي بدها توصلنا بالنهاية لعند إبنك يسوع. نتحرر من كلّ شريعة بتوقف بطريق مسيرتنا. نِهدُم الإنسان القديم ونِلبُس الإنسان الجديد تنكون سفرا للمسيح.
مع يسوع المثال الأول لكلّ مكرس، مع مريم خادمة سرّ التجسد والفدا، مع يوسف الصامت والسهران على تتميم مشيئة الله ومع سمعان صورة المكرس اللي ما فقد الثقة بتحقيق وعود الله منصلي البيت الآخير من مسبحتنا على نية كل مريض ومتألم ، كل فقير ومشرد، تيعرفوا إنك بتحبهم وجيت كرمالون. آمين.